Full Post Style

សហរដ្ឋអាមេរិកកាលពីថ្ងៃសុក្រ បានចោទប្រកាន់អ៊ីរ៉ង់ថា មានជាប់ពាក់ព័ន្ធយ៉ាងជិតស្និទ្ធក្នុងការវាយប្រហារគឺនៅលើនាវាពាណិជ្ជកម្មដែលបានឆ្លងកាត់សមុទ្រក្រហម ជាមួយនឹងក្រុមឧទ្ទាម Houthi នៃប្រទេសយេម៉ែន នេះបើយោងតាមការចេញផ្សាយរបស់ VOA កាលពីថ្ងៃទី ២៣ ខែធ្នូ ឆ្នាំ ២០២៣។

សេតវិមានបានចេញផ្សាយជាសាធារណៈនូវការស៊ើបការណ៍សម្ងាត់មួយ ខណៈដែលក្រុមបះបោរយេម៉ែនដែលយើងស្គាល់ថាពួកគេទាំងពីរគឺជាក្រុមមានទំនាក់ទំនងយ៉ាងស្និតស្នាលជាមួយនឹងអ៊ីរ៉ង់។ហើយការសាមគ្គីភាពនោះគឺដើម្បីជួយដល់ក្រុមហាម៉ាស ក្នុងការវាយប្រហារតំបន់ហ្គាហ្សាស្ទ្រីប។

តាមរយៈការស៊ើបការដោយសម្ងាត់ពីខាងសេតវិមានបានឲ្យដឹងថា ទីក្រុងតេអេរ៉ង់បានផ្តល់យន្តហោះគ្មានមនុស្សបើក និងកាំជ្រួចដល់ក្រុម Houthi ជាបន្តបន្ទាប់។

ដោយក្នុងនោះអ្នកនាំពាក្យក្រុមប្រឹក្សាសន្តិសុខជាតិលោកស្រី Adrienne Watson បាននិយាយថា “យើងដឹងថាអ៊ីរ៉ង់បានចូលរួមយ៉ាងស៊ីជម្រៅក្នុងការរៀបចំផែនការប្រតិបត្តិការ ក្នុងការប្រឆាំងនឹងនាវាពាណិជ្ជកម្មនៅក្នុងសមុទ្រក្រហមទាំងអស់” ។ លោកស្រីបាននិយាយទៀតថា “យើងមិនមានហេតុផលណាមួយដែលឲ្យយើងជឿថា អ៊ីរ៉ង់កំពុងតែព្យាយាមរារាំងពួក Houthis ក្នុងការលុកដៃជាមួយនឹងក្រុមហាម៉ាសនោះទេ” ។

ក្រុម Houthis ដែលជាអ្នកគ្រប់គ្រងផ្នែកដ៏ធំមួយនៃប្រទេសក្រីក្របំផុតរបស់ឧបទ្វីបអារ៉ាប់ រួមទាំងរដ្ឋធានី Sanaa បានបើកការវាយប្រហារដោយយន្តហោះគ្មានមនុស្សបើក និងកាំជ្រួចជាង 100 គ្រឿង ដោយសំដៅលើនាវាជំនួញចំនួន 10 ដែលធ្វើដំណើរឆ្លងកាត់ នេះបើយោងតាមមន្ទីរបញ្ចកោណ។

ជាមួយនឹងការរំខានក្នុងការធ្វើចរាចរពាណិជ្ជកម្មកាន់តែខ្លាំងឡើងនាពេលថ្មីៗនេះ សហរដ្ឋអាមេរិកបានប្រកាសអំពីក្រុមបេសកកម្មកងទ័ពជើងទឹកពហុជាតិដែលមានជាង 20 ប្រទេស ដើម្បីការពារនាវាដែលឆ្លងកាត់សមុទ្រក្រហមទាំងអស់។

គួរបញ្ជាក់ថានៅក្នុងការបង្ហាញកម្លាំងទាំងនោះ គេសង្កេតឃើញថា មាននាវាផ្ទុកយន្តហោះអាមេរិក USS Dwight D. Eisenhower បានចូលឈូងសមុទ្រ Aden ដោយមានសេចក្តីរាយការណ៍ព័ត៌មានជាបន្តបន្ទាប់ថា រដ្ឋបាលរបស់ប្រធានាធិបតី Joe Biden កំពុងថ្លឹងថ្លែងការវាយប្រហារយោធា ប្រសិនបើនាវារបស់ក្រុម Houthis នៅតែបន្តវាយប្រហារ។

បើយោងតាមរយៈមេដឹកនាំក្រុមឧទ្ទាម Abdel-Malek al-Houthi បានព្រមានកាលពីថ្ងៃពុធថា ប្រសិនបើពួកគេត្រូវរងការវាយប្រហារដោយកងទ័ពរបស់អាមេរិកនោះ ពួកឧទ្ទាមនឹងវាយប្រហារតបតវិញដោយមិនស្ទាក់ស្ទើរ ហើយពួកយើងនឹងប្រឆាំងរាល់ “នាវាចម្បាំងរបស់អាមេរិក និងផលប្រយោជន៍របស់អាមេរិក បូករួមទាំងនាវាចរណ៍របស់អាមេរិកថែមទៀតផង”។

បើទោះជាយ៉ាងណាក៏ដោយខាងសេតវិមានបាននិយាយថា ការវិភាគដែលត្រូវបានខ្លួនមើលឃើញនោះ យើងអាចប្រាកដថា៖ យន្តហោះគ្មានមនុស្សបើក KAS-04 របស់អ៊ីរ៉ង់ និងយានគ្មានមនុស្សបើកដែលបាញ់ដោយក្រុម Houthi វាពិតជាមានលក្ខណៈពិសេសដូចគ្នា ដែលអាចធ្វើឲ្យយើងវាយតម្លៃបានថា អាវុធដែលបានប្រើប្រាស់ដោយក្រុមHouthi វាគឺជាជំនួយរបស់អ៊ីរ៉ុង ។

សេតវិមានបាននិយាយទៀតថា ពួក Houthis ក៏ពឹងផ្អែកលើប្រព័ន្ធត្រួតពិនិត្យ ដែលផ្តល់ដោយអ៊ីរ៉ង់នៅសមុទ្រក្រហមដូចគ្នាដែរ។

ក្នុងកំឡុងពេលមួយទស្សវត្សន៍កន្លងមកនេះ ប្រធានាធិបតីចិន លោក ស៊ី ជីនពីង កាន់តែមានទំនុកចិត្តក្នុងការដឹកនាំប្រទេសរបស់លោក ឲ្យឆ្ពោះទៅរកអនាគតនៃទំនើបភាវូបនីយកម្ម ដោយលោកបានចាត់ទុកថា វាគឺជាអាទិភាពនយោបាយកំពូលដែលស្ថិតនៅក្រោមការដឹកនាំរបស់គណបក្សលោក។

លោក ស៊ី ជីនពីង  បាននិយាយថា “ការលើកកម្ពស់ទំនើបភាវូបនីយកម្មរបស់ចិន គឺជាកិច្ចការរុករកជាច្រើនផ្នែក ដែលភាគច្រើនគឺពិភពលោកមិនទាន់បានស្គាល់។ យើងត្រូវស្វែងរកវាដោយក្លាហាន គឺដើម្បីលើកកម្ពស់បុព្វហេតុរបស់យើងតាមរយៈកំណែទម្រង់ និងការច្នៃប្រឌិត”។

មេដឹកនាំប្រទេសចិន លោក ស៊ី ជីនពីង បាននិយាយទៅកាន់ជនរួមជាតិយ៉ាងម៉ឺងម៉ាត់ថា កំណែទម្រង់ត្រូវតែបន្តលើមាគ៌ានៃសង្គមនិយមជាមួយនឹងលក្ខណៈរបស់ចិន។ «កំណែទម្រង់ត្រូវតែដើរលើផ្លូវត្រូវ ដោយមិនដើរថយក្រោយ បើទោះជាផ្លូវដែលយើងដើរនោះវាពិបាកយ៉ាងណាក៏ដោយ តែយើងមិនត្រូវងាកទៅអតីតកាល ឬដើរលើផ្លូវខុសដែលខុសពីទិសដៅនយោបាយរបស់យើងជាដាច់ខាត»។

លោក ស៊ី ជីនពីង  បានដឹកនាំការបង្កើតក្រុមឈានមុខគេកណ្តាលសម្រាប់ការធ្វើកំណែទម្រង់ស៊ីជម្រៅជារួម បន្ទាប់ពីមានការកោះប្រជុំប្រហែល 70 ដង កន្លងរួចមក។ ប្រធានាធិបតីចិនរូបនេះ ក៏ចាប់ផ្តើមអនុម័តផែនការ និងសំណើជាច្រើន រួមទាំងការអភិវឌ្ឍន៍តំបន់ពាណិជ្ជកម្មសេរីចិន (សៀងហៃ) ការកសាងទីផ្សារក្នុងស្រុក និងការអនុម័ត “មេទន្លេ”  និងប្រព័ន្ធ “បឹង” ជាដើម។

លោក Xi បានអំពាវនាវឱ្យមានការជំរុញគ្រប់ជ្រុងជ្រោយនៃអភិបាលកិច្ចផ្អែកលើច្បាប់ ដោយសង្កត់ធ្ងន់ថា ពេញមួយដំណើរការកំណែទម្រង់ សារៈសំខាន់ដ៏អស្ចារ្យត្រូវតែភ្ជាប់ទៅនឹងការគិត និងធ្វើសកម្មភាពក្រោមការដឹកនាំរបស់នីតិរដ្ឋ ហើយការកែទម្រង់ត្រូវតែធ្វើឡើងស្របតាមនីតិរដ្ឋ។

ជាងនេះទៅទៀត លោកបានកំណត់ទិសដៅតម្លៃសម្រាប់ការកែទម្រង់យ៉ាងស៊ីជម្រៅគ្រប់ជ្រុងជ្រោយ ពោលគឺដើម្បីធានាឱ្យប្រជាពលរដ្ឋទាំងអស់អាចទទួលបានផលប្រយោជន៍កាន់ច្រើន ព្រមទាំងភាពយុត្តិធម៌ ដែលបានមកពីផ្លែផ្កានៃកំណែទម្រង់ គឺនូវក្រោមការអភិវឌ្ឍន៍របស់លោក ស៊ី ជីនពីង ។

គួរបញ្ជាក់ថា ក្នុងរយៈដប់ឆ្នាំដែលឆ្លងកាត់ការធ្វើកំណែទម្រង់យ៉ាងស៊ីជម្រៅបានឲ្យដឹងថា ទេសចិនបានលុបបំបាត់ភាពក្រីក្រស្ទើរទាំងស្រុង ហើយព្រមទាំងបានបង្កើតឲ្យប្រជាជនរបស់ខ្លួនអាចទទួលបានប្រាក់ចំណូលល្អជាងមធ្យម និងល្អបង្គួរថែមទៀតផង។ ប្រទេសចិនបានបង្កើតប្រព័ន្ធសន្តិសុខសង្គមដ៏ធំបំផុតនៅក្នុងពិភពលោក ហើយអាយុកាលជាមធ្យមរបស់ប្រជាជនខ្លួនបានកើនឡើងពី 74.8 ឆ្នាំរហូតដល់ 78.2 ឆ្នាំក្នុងរយៈពេលមួយទសវត្សរ៍នៃអណត្តិរបស់លោកផងដែរ។

ក្រោមការដឹកនាំរបស់លោក Xi ប្រទេសចិនបានសំរេចគោលដៅរបស់ខ្លួនក្នុងការកសាងសង្គមដែលមានវិបុលភាពកម្រិតមធ្យមនៅគ្រប់វិស័យ ដែលជាការបោះជំហានដ៏សំខាន់មួយដើម្បីឲ្យវាសក្តិសមនិងពាក្យមួយឃ្លាថា ចិនគឺជាមហាលអំណាចសេដ្ឋកិច្ចទី​ ២ នៅក្នុងពិភពលោក។

គួរបញ្ជាក់សារជាថ្មី ចំពោះការសម្រេចចិត្តដ៏វៃឆ្លាតរបស់លោក ស៊ី ជីនពីង  ក្នុងនាមជាប្រធានគណៈកម្មការយោធាមជ្ឈិម ដែលជាហេតុធ្វើឲ្យកងទ័ពរំដោះប្រជាជនចិនបានបញ្ចប់កំណែទម្រង់ការពារជាតិ និងយោធាយ៉ាងរលូនបំផុត បើយើងគិតចាប់តាំងពីការបង្កើតសាធារណរដ្ឋប្រជាមានិតចិនរួចមក។

លោក ស៊ី ជីនពីង គឺជាមេដឹកនាំមួយរូបដែលតែងតែស្វែងយល់ពីបញ្ហាប្រឈមជុំវិញ ខ្លួនជានិច្ច ហើយបញ្ហាប្រឈមទាំងនោះរមែងទទួលបាននូវដំណោះដែលប្រកបដោយប្រសិទ្ធិភាព។

លោកបានមានប្រសាសន៍ទៀតថា “ទំនើបភាវូបនីយកម្មដែលយើងកំពុងស្វែងរកនាពេលកន្លងមកនេះ វាមិនមែនសម្រាប់តែប្រទេសចិនតែម្នាក់ឯងនោះទេ តែយើងនឹងចែករំលែកទៅលើបណ្តាលប្រទេសដែលកំពុងអភិវឌ្ឍន៍ទាំងអស់ហើយពួកគេនឹងទទួលបានវា តាមរយៈកិច្ចខិតខំប្រឹងប្រែងរួមគ្នារបស់យើង។ ទំនើបភាវូបនីយកម្មសកលគួរតែត្រូវបានបន្តដើម្បីបង្កើនការអភិវឌ្ឍដោយសន្តិភាព និងកិច្ចសហប្រតិបត្តិការដែលមានផលប្រយោជន៍ទៅវិញទៅមក និងនាំមកនូវវិបុលភាពសម្រាប់មនុស្សទាំងអស់គ្នា”។ 

ប្រធានាធិបតីរុស្ស៊ី លោក វ្ល៉ាឌីមៀ ពូទីន បានប្តេជ្ញាចំណាយទឹកប្រាក់បន្ថែមទៀតប្រមាណ 157 ពាន់លានដុល្លារអាមេរិក ដើម្បីប្រយុទ្ធជាមួយអ៊ុយក្រែន។ គួរបញ្ជក់ថា ការតំឡើងនៃប្រាក់ចំនាយនៃថវិការជាតិ ប្រហែលជា ៧០% លើកនេះ គឺលោក ពូទីន បានសង្ឃឹមយ៉ាងមុតមាំថា រុស្ស៊ីអាចនឹងទទួលបាននៅជ័យជំនះឆ្នាំក្រោយ។

សេចក្តីសង្ឃឹមរបស់វិមានក្រឹមឡាំងជុំវិញការយកឈ្នះលើសង្គ្រាមកូនកាត់មួយនេះ គឺកើតឡើងនៅពេលដែលលោក Volodymyr Zelenskyy ប្រធានាធិបតីរបស់អ៊ុយក្រែនបាន បរាជ័យ ក្នុងការទទួលបានជំនួយប្រមាណ $61.4bn ពីសហរដ្ឋអាមេរិក និង $76.6bn ពីសហភាពអឺរ៉ុប ក្នុងចំណោមសម្ព័ន្ធមិត្តដ៏រឹងមាំបំផុតរបស់ខ្លួន។

បើយោងទៅតាមការអះអាងរបស់លោក ពូទីន បាននិយាយនៅក្នុងសន្និសីទកាសែតប្រចាំឆ្នាំ នៅឯមជ្ឈមណ្ឌលពាណិជ្ជកម្មអន្តរជាតិនៅទីក្រុងមូស្គូកាលពីថ្ងៃទី 14 ខែធ្នូ ថា លោកកំពុងតែមានតម្រុយក្នុងការឈ្នះសង្គ្រាម គឺនៅពេលដែលជំនួយសម្រាប់អ៊ុយក្រែនបានធ្លាក់ចុះ។ បីថ្ងៃក្រោយមក គាត់បានប្រាប់ការប្រជុំនៃគណបក្ស United Russia Party របស់គាត់ថា “អ៊ុយក្រែន នឹងក្លាយទៅជាអាយ៉ង របស់រុស្ស៊ី ព្រោះទីក្រុង Kyiv មិនមានការការពារពីណាតូនោះទេ។

ផ្ទុយទៅវិញ កាលពីថ្ងៃទី 19 ខែធ្នូ  លោក Zelenskyy បានដាក់សំណួរដ៏អាម៉ាស់មួយដោយស្តីអំពីមូលហេតុដែលសមាជិកសភាមកពីគណបក្សសាធារណរដ្ឋនៅទីក្រុង Washington និង Russophilic Hungary នៅក្នុងសហភាពអឺរ៉ុបបានរារាំងដំណើរការនយោបាយនៃការអនុម័តជំនួយយោធាចំពោះប្រទេសខ្លួន។ ដោយលោកបាននិយាយថា “ខ្ញុំមានទំនុកចិត្តថាសហរដ្ឋអាមេរិកនឹងមិនធ្វើឱ្យយើងខកចិត្តឡើយ ព្រោះថាអ្វីដែលយើងបានព្រមព្រៀងជាមួយសហរដ្ឋអាមេរិកនឹងត្រូវបានអនុវត្តយ៉ាងពេញលេញ” ។

យ៉ាងណាមិញ“សម្រាប់ពីខាង EU ប្រមាណ 50 ពាន់លានអឺរ៉ូ លោក Zelenskyy ក៏និយាយដូចគ្នាថា ខ្ញុំមានទំនុកចិត្តថាការសម្រេចចិត្តមួយនឹងត្រូវបានធ្វើឡើងក្នុងពេលដ៏ខ្លីខាងមុខនេះ គឺនៅពេលដែលពួកគេកោះប្រ ដើម្បីធានាថាអ៊ុយក្រែនទទួលបាន 50 ពាន់លានពីមូលនិធិមួយនេះ។

គួររំលឹកថា សហភាពអឺរ៉ុបកំពុងស្នើឱ្យផ្តល់ជំនួយផ្នែកហិរញ្ញវត្ថុចំនួន 50 ពាន់លានអឺរ៉ូដល់អ៊ុយក្រែនក្នុងរយៈពេល 4 ឆ្នាំខាងមុខ ក៏ដូចជា 20 ពាន់លានដាច់ដោយឡែកពីគ្នានៅក្នុងជំនួយយោធានៅឆ្នាំក្រោយ ដែលសរុបជាទឹកប្រាក់ចំនួន 76.6 ពាន់លានដុល្លារសហរដ្ឋអាមរិក។

បើទោះជាយ៉ាងណាក៏ដោយ ការប្តេជ្ញាចិត្តរបស់លោក ពូទីន ត្រូវបានដាក់បញ្ចូលទៅក្នុងទស្សនៈនៅក្នុងរបាយការណ៍របស់កាសែត Bild នៅថ្ងៃទី 14 ខែធ្នូ ដែលក្នុងនោះប្រភពរុស្ស៊ីដែលមិនបញ្ចេញឈ្មោះបានពិពណ៌នាអំពីផែនការដើម្បីវាយលុកតំបន់ដែលនៅសេសសល់នៃតំបន់ Luhansk និង Donetsk និងចាប់យកតំបន់ Kharkiv នៅចុងឆ្នាំ 2024។ ហើយប្រសិនបើការវាយលុកនោះទទួលបានជោគជ័យ រុស្ស៊ីនឹងបន្ថែមវាយលុកឲ្យខ្លាំងក្លាជាងមុនទៀត។

ដោយក្នុងនោះមានប្រភពដដែលនោះបានពិពណ៌នាទៀតថា ផែនការរបស់រុស្ស៊ីនៅដំណាក់កាលទីពីរគឺត្រូវយកផ្នែកធំនៃតំបន់ Zaporizhia និង Dnipropetrovsk បន្ទាប់មកពួកគេក៏ឆ្ពោះទៅកាន់ទីក្រុង Kharkiv នៅចុងឆ្នាំ 2025 និង 2026 ។

ប្រទេសរុស្ស៊ីបានផ្តល់ប្រាក់ឧបត្ថម្ភ និងកម្ចីរដ្ឋជាង ១២ពាន់លានដុល្លារសហរដ្ឋអាមេរិក ដើម្បីរក្សាវិស័យអាកាសចរណ៍របស់ខ្លួន។ ​ វាជាលើកទី ១ ហើយ ដែលរដ្ឋាភិបាលបានចំណាយទៅលើវិស័យមួយនេះ  បើយើងគិតចាប់តាំងពីការដាក់ទណ្ឌកម្មរបស់ពួកលោកខាងលិច ជុំវិញជុំវិញការលុកលុយរបស់ទីក្រុងមូស្គូទៅលើអ៊ុយក្រែន កាលពីខែកុម្ភៈ ឆ្នាំ២០២២។

ដោយមានការពឹងផ្អែកលើយន្តហោះដែលផលិតពីបរទេស រុស្ស៊ីបានប្រឈមមុខនឹងភារកិច្ចដ៏គួរឱ្យភ័យខ្លាចក្នុងការអភិវឌ្ឍន៍ផ្នែក ឧស្សាហកម្មអាកាសចរណ៍ របស់ខ្លួនតែម្នាក់ឯង ក៏ដូចជាគ្រឿងបន្លាស់ផ្សេងៗជាច្រើនទៀត ខណៈពេលដែលការទិញយន្តហោះត្រូវពឹងផ្អែកលើឈ្មួញកណ្តាលរបស់បរទេស គឺដើម្បីជៀសវាងការរឹបអូសណាមួយអាចកើតឡើងក្នុងកំឡុងពេលដឹកជញ្ជូន។

គួរបញ្ជាក់ថាក្រុមហ៊ុនផលិតយន្តហោះរបស់ពួកលោកខាងលិច Airbus និង Boeing  បានបញ្ឈប់ការផ្គត់ផ្គង់សេវាកម្ម និងគ្រឿងបន្លាស់របស់ពួកគេចាប់តាំងពីនៅក្នុងខែមីនា ឆ្នាំ 2022 ព្រមទាំងលុបចោលរាល់ការថែរទាំងជាប្រចាំសម្រាប់ក្រុមហ៊ុនអាកាសចរណ៍ Aeroflot និងក្រុមហ៊ុនអាកាសចរណ៍រុស្ស៊ីផ្សេងៗជាច្រើនទៀត។

ចាប់តាំងពីពេលនោះមក ប្រទេសរុស្ស៊ីបានចាប់ផ្តើមការចំណាយទៅលើវិស័យមួយនេះដោយគិតជាទឹកប្រាក់មានចំនួនប្រមាណ 1.09 ពាន់ពាន់លានរូប្ល (12.07 ពាន់លានដុល្លារ) ដើម្បីគាំទ្រដល់ឧស្សាហកម្មអាកាសចរណ៍ស៊ីវិល រួមទាំងការផលិតយន្តហោះ និងជំនួយហិរញ្ញវត្ថុសម្រាប់ក្រុមហ៊ុនអាកាសចរណ៍របស់ប្រទេសខ្លួនឡើងវិញ។

បើយោងទៅតាមការគណនារបស់ Reuters ដោយផ្អែកលើទិន្នន័យពីក្រសួងហិរញ្ញវត្ថុ និងសភាគណនេយ្យដែលត្រួតពិនិត្យការអនុវត្តថវិកាបានបង្ហាញថា៖ ការចំណាយលើគម្រោងខាងលើនេះ គឺស្ទើរតែស្មើនឹងពីរដងឬច្រើនជាង 547 ពាន់លានរូប្លែនៅក្នុងការទូទាត់ដែលបានធ្វើឡើងក្នុងឆ្នាំ 2020-21 នៅពេលដែលជំងឺរាតត្បាត COVID-19 បណ្តាលឱ្យមានការថយចុះយ៉ាងខ្លាំងនៃការធ្វើដំណើរតាមផ្លូវអាកាស ករណីនេះបានបង្ហាញពីទំហំនៃកិច្ចខិតខំប្រឹងប្រែងរបស់វិមានក្រឹមឡាំង ក្នុងការគ្រប់គ្រងឧស្សាហកម្មដ៏សំខាន់មួយមួយនេះឡើងវិញយ៉ាងពេញទំហឹង។

បើយោងតាមការអត្ថធិប្បាយរបស់ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយកាលពីសប្តាហ៍មុនថា “កងយន្តហោះរបស់យើងបានផ្ទុកលើសទម្ងន់ គឺជាមួយនឹងយន្តហោះផលិតពីបរទេស” ។ ដូច្នេះហើយចំពោះកង្វះខាតបែបនេះ យើងមិនត្រូវឲ្យវាបន្តកើតឡើងទៀតនោះទេ “បច្ចុប្បន្នយើងគ្រោងនឹងផលិតយន្តហោះជាង 1,000 គ្រឿងនៅឆ្នាំ 2030 ដែលជាយន្តហោះរបស់យើងផ្ទាល់តែម្តង។

បើយោងតាមប្រភពមួយសំមិនបញ្ចេញឈ្មោះបានឲ្យដឹងថា នៅក្នុងប្រទេសរុស្ស៊ីនាពេលនេះ គឺមានយន្តហោះត្រឹមតែ 133 គ្រឿងតែប៉ុណ្ណោះ ដែលជាយន្តហោះរបស់ក្រុមហ៊ុន Superjets គឺផលិតដោយក្រុមហ៊ុនរដ្ឋ United Aircraft Corporation នឹងមានមូលដ្ឋាននៅសហរដ្ឋអាមេរិក ។ ហើយចំពោះយន្តហោះដែលផលិតដោយរុស្ស៊ីខ្លួនឯងវិញគឺមាន Tupolev, Yakovlev និង Ilyushin ប៉ុន្តែពួកគេកម្រយកមកប្រើប្រាស់សម្រាប់ការហោះហើរពាណិជ្ជកម្មខ្លាំងណាស់។

ប្រភពដដែលបាននិយាយទៀតថា “ការសង្កត់ធ្ងន់ជាចម្បងរបស់វិមានក្រឹមឡាំង គឺការពង្រីការគាំទ្រនៃការលក់ ក៏ដូចជាការពង្រីកសមត្ថភាពផលិតកម្ម និងការបង្កើតប្រព័ន្ធសេវាកម្មក្រោយការលក់ជាដើម”។

ឧស្សាហកម្មផ្លូវអាកាស វាត្រូវបានគេចាត់ទុកថា ជារឿងសំខាន់ដ៏ធំមួយសម្រាប់ប្រទេសរុស្ស៊ី ទាំងការដឹកជញ្ជូនមនុស្ស និងទំនិញឆ្លងកាត់ទឹកដីដ៏ធំសម្បើមរបស់ខ្លួន និងដើម្បីជំរុញការនិទានរឿងរបស់ទីក្រុងម៉ូស្គូដែលថាទណ្ឌកម្មរបស់ពួកលោកខាងលិចពិតជាមាន ប៉ុន្តែផលប៉ះពាល់ចំពោះខ្លួនស្ទើតែគ្មាន។