តំបន់គ្រីមៀកាលពីថ្ងៃពុធត្រូវបានគ្របដណ្តប់ដោយអ័ព្ទយ៉ាងក្រាស់ក្រែល ខណៈដែល យោធារុស្ស៊ីកំពុងតែស្វែងរកមធ្យោបាយជាច្រើនវិធី ដើម្បីការពារឧបទ្វីបសមុទ្រខ្មៅពីការវាយប្រហារតាមអាកាសរបស់អ៊ុយក្រែន នេះបើយោងតាមការចុះផ្សាយរបស់ newsweek កាលពីថ្ងៃទី ១៧ ខែមករា ឆ្នាំ២០២៤។
បើយោងតាមការរៀបរាប់ពីអ្នកស្រុកដែលរស់នៅក្នុង ឧបទ្វីប Crimean បាននិយាយជាមួយប៉ុស្តិ៍ទូរទស្សន៍អ៊ុយក្រែន Suspilne ថា ការផ្ទុះត្រូវបានគេឮនៅក្នុងផ្នែកខ្លះនៃឧបទ្វីបកាលពីព្រឹកថ្ងៃពុធ រួមជាមួយនឹងការជូនដំណឹងអំពីការវាយឆ្មក់តាមអាកាសដែលបានផ្ទុះឡើងនៅក្នុងទីក្រុងកំពង់ផែ Sevastopol អស់រយៈពេលប្រហែលជាកន្លះម៉ោង។ ហើយចំណែកឯស្ពាន Kerch Straight ដែលគេស្គាល់ថា វាជាសរសៃឈាមរបស់រុស្ស៊ីដែលបានតភ្ជាប់ពី Crimea ទៅកាន់រុស្ស៊ីដីគោកវិញ វាត្រូវបានអាជ្ញាធរបិទចរាចរណ៍ក្នុងអំឡុងពេលនោះទាំងស្រុង។
បើយោងតាមអ្នកយកការណ៍របស់newsweek បានឲ្យដឹងថា បច្ចុប្បន្នអ៊ុយក្រែនមានគោលដៅក្នុងការវាយប្រហារចំនួនពីរធំៗ ដោយក្នុងនោះខាងទីក្រុង Kyiv បាននិយាយថា ខ្លួនបានផ្តោតទៅកងនាវាចរសមុទ្រខ្មៅរបស់រុស្ស៊ីជាចម្បង ហើយបន្ទាប់មកគឺមជ្ឈមណ្ឌលយោធាយុទ្ធសាស្ត្រដែលមានទីតាំងស្ថិតនៅក្នុងឧបទ្វីបគ្រីមៀ។
គួររំលឹកថា តំបន់ Crimea វាត្រូវបានបញ្ចូលដោយខុសច្បាប់ពីសំណាក់ប្រទេសរុស្ស៊ីកាលពីក្នុងឆ្នាំ 2014 ចំពោះតំបន់មួយនេះផងដែរ វាត្រូវបានមេដឹកនាំវិមានក្រឹមឡាំង បានយកមកធ្វើជាមជ្ឈមណ្ឌលយោធាយុទ្ធសាស្ត្រសម្រាប់ទីក្រុងមូស្គូក្នុងការផ្គត់ផ្គង់កងទ័ពរបស់ខ្លួន ដើម្បីប្រយុទ្ធនៅតាមខ្សែបន្ទាត់ជួរមុខក្នុងប្រទេសអ៊ុយក្រែនតាំងពីថ្ងៃទី 24 ខែកុម្ភៈ ឆ្នាំ 2022 មកម្ល៉េះ។
ចាប់តាំងពីពេលនោះមក ឧបទ្វីបមួយនេះវាបានក្លាយជាចំណុចគោលដៅកំពូលមួយសម្រាប់យោធារបស់ទីក្រុង Kyiv ដោយក្នុងនោះប្រធានាធិបតីអ៊ុយក្រែន លោក Volodymyr Zelensky បាននិយាយនៅដើមឆ្នាំថ្មីនេះថា Crimea គឺជា អាទិភាពកំពូល សម្រាប់កងទ័ពរបស់យើងក្នុងការវាយលុកនាឆ្នាំ 2024 ។
យ៉ាងណាមិញយោធារបស់ទីក្រុងគីវ បានបើកការវាយប្រហារដោយយន្តហោះគ្មានមនុស្សជាច្រើនគ្រឿង បូករួមទាំងគ្រាប់រំសេវរាប់ពាន់គ្រាប់។ អ៊ុយក្រែនបានកំណត់គោលដៅដោយជោគជ័យនៅលើហេដ្ឋារចនាសម្ព័ន្ធសំខាន់ៗនៅទូទាំងឧបទ្វីប រួមទាំងការវាយលុកចំនួនពីរលើកគឺលើស្ពាន Kerch Strait ព្រមទាំងកងនាវាសមុទ្រខ្មៅរបស់ ប្រធានាធិបតីរុស្ស៊ី លោក Vladimir Putin ថែមទៀតផង ។
ទន្ទឹមនឹងនោះលោកឧត្តមសេនីយឯក Kyrylo Budanov របស់អ៊ុយក្រែនបានព្រមានលោក Putin ក្នុងអំឡុងពេលបទសម្ភាសន៍ជាមួយកាសែតបារាំង Le Monde ថា ការវាយប្រហាររបស់ប្រទេសគាត់នៅលើឧបទ្វីបគ្រីមៀ វាគ្រាន់តែជាជំហ៊ានដំបូងរបស់ខ្លួនតែប៉ុណ្ណោះ។
បើទោះជាយ៉ាងណាក៏ដោយចំពោះវិធីសាស្ត្រការពារដំបូងរបស់ប្រទេសរុស្ស៊ី គឺត្រូវបានអភិបាលក្រុង Sevastopol លោក Mikhail Razvozhaev បានសរសេរនៅក្នុងសារបង្ហោះទៅកាន់ Telegram ថា អ័ព្ទខ្មៅដែលយើងប្រើដើម្បីទៅគ្រប់ដណ្តប់តំបន់ឈូងសមុទ្ររបស់ទីក្រុងកំពង់ផែ Feodosia វាគឺជាមធ្យោបាយបណ្តោះអាសន្ន ហើយ “មធ្យោបាយបែបនេះ វាប្រហែលជាមិនមានស្តង់ដារ” ក្នុងការការពារឧបទ្វីបគ្រីមៀពីការវាយប្រហារបានដែរ។
