Full Post Style

អតីតទីប្រឹក្សារបស់លោក Donald Trump ជាច្រើននាក់បានព្រមានថា អតីតប្រធានាធិបតីរបស់សហរដ្ឋអាមេរិកនឹងព្យាយាមដកសហរដ្ឋអាមេរិកចេញពីសម្ព័ន្ធភាពណាតូជាផ្លូវការនៅថ្ងៃណាមួយ ប្រសិនបើគាត់ជាប់ឆ្នោតជាប្រធានាធិបតីនាអាណត្តិទីពីរ នេះបើយោងតាមការចុះផ្សាយរបស់ CNN កាលពីថ្ងៃទី ១២ ខែកុម្ភៈ ឆ្នាំ២០២៤។

        យ៉ាងណាមិញការប្រកាសរបស់លោក Trump ទៅលើផ្នែកការពារសន្តិសុខរបស់សហរដ្ឋអាមេរិក វាក៏ជះឥទ្ធិពលទៅដល់កិច្ចព្រមព្រៀងត្រីភាគីមួយផ្សេងទៀតដូចគ្នា គឺនៅក្នុងកិច្ចព្រមព្រៀងដែលស្តីអំពីការការពារទៅវិញទៅមករបស់ខ្លួនជាមួយកូរ៉េខាងត្បូង និងជប៉ុន។

គួរបញ្ជាក់ថា ថ្វីត្បិតតែការលើកឡើងខាងលើនេះមិនបានចេញពីមាត់របស់លោក Trump ដោយផ្ទាល់ក៏ដោយ ប៉ុន្តែវាគឺជាការអះអាងរបស់ឧត្តមសេនីយ៍ដែលបានចូលនិវត្តន៍ម្នាក់ John Kelly ដែលគ្រប់បានស្គាល់រូបលោកយ៉ាងច្បាស់ថា គាត់គឺជាអ្នកបម្រើការជាប្រធានបុគ្គលិកសេតវិមានយ៉ាងជិតដិតម្នាក់របស់លោក Trump ។

លោក Kelly បាននិយាយទៀតថា វាហាក់ដូចជាមិនមានប្រយោជន៍ណាមួយទាល់តែសោះរវាងសហរដ្ឋអាមេរិក នឹងអង្គការណាតូ។  លោកបាននិយាយបន្តទៀតថា បើទោះបីជាសហរដ្ឋអាមេរិកដើរចេញពីអង្គការណាតូក៏ពិតមែន តែលោកជឿជាក់ថា លោកពូទីនក៏នៅតែមិនហ៊ានបន្តការឈ្លានពានរបស់លោកតទៅទៀតដែរ ម្យ៉ាងទៀត មេដឹកនាំកូរ៉េងខាងជើងក៏មិនមានលទ្ធិភាពគ្រប់គ្រាន់ក្នុងការឈ្លានពានកូរ៉េងខាងត្បូងនោះដែរ។ ហេតុដូច្នេះហើយ សហរដ្ឋអាមេរិកមិនគួរណាបង្កើនការចំណាយទៅលើសម្ព័ន្ធមិត្ត​ និងអង្គការណាតូតទៅទៀតឡើយ។ លោកបាននិយាយរៀបរាប់ថា ការទាមទាររបស់ប្រធានាធិបតី Joe Biden កន្លងមក វាគឺគ្មានប្រយោជន៍អ្វីក្រៅពីការបង្កឲ្យប្រជាជនអាមេរិកបន្ថែមការបង់ពន្ធ ហើយពិភពលោកគឺមានតែសង្រ្គាមមិនចេះចប់។

ប្រសិនបើយើងរំលឹកឡើងមកបន្តិច  នៅក្នុងស្នូលនៃអង្គការសន្ធិសញ្ញាអាត្លង់ទិកខាងជើង គឺបានបែងចែកនៅក្នុងមាត្រាទាំង 5 នៃសន្ធិសញ្ញា គឺមានន័យថា ការសន្យានៃការការពារសមូហភាព -ប្រសិនបើមានការវាយប្រហារណាមួយដែលជាសមាជិក នោះវានឹងក្លាយទៅជាការវាយប្រហារលើប្រជាជាតិទាំងអស់នៅក្នុងសម្ព័ន្ធភាព។

ប៉ុន្តែបើទោះជាយ៉ាងណាក៏ដោយ លោក Trump បានត្អូញត្អែរជាយូរណាស់មកហើយថា ចំនួនទឹកប្រាក់ដែលសមាជិកណាតូចំណាយលើវិស័យការពារជាតិ គឺមិនអាចធៀបនឹងសហរដ្ឋអាមេរិកបានឡើយ។

មានក្រុមអ្នកជំនាញជាច្រើនបាននិយាយថា ប្រសិនបើលោក Donald Trump ជាប់ឆ្នោត ការគាំទ្ររបស់សហរដ្ឋអាមេរិកចំពោះតៃវ៉ាន់ ក៏នឹងស្ថិតនៅក្នុងគ្រោះថ្នាក់ដូចគ្នាដែរ។

ប្រសិនបើយើងរំឮកឡើងមកវិញពីស្ទីល Trump នឹងអនុវត្តនៅក្នុងការិយាល័យ Oval គាត់បាននិយាយថា តៃវ៉ាន់ពិតជាតូចពេកហើយក្នុងការការពារខ្លួនដោយជោគជ័យដើម្បីប្រឆាំងនឹងការឈ្លានពានរបស់ចិន ហើយតៃវ៉ាន់ក៏តូចពេកដែរសម្រាប់សហរដ្ឋអាមេរិកក្នុងការធ្វើឲ្យយើងទៅយកចិត្តទុកដាក់នោះ។

នាយកដ្ឋានកែតម្រូវរបស់ប្រទេសថៃ (DoC) បាននិយាយកាលពីថ្ងៃអង្គារថា អតីតនាយករដ្ឋមន្ត្រីថាក់ស៊ីន ស៊ីណាវ៉ាត្រា អាចនឹងបញ្ចប់ការជាប់ពន្ធនាគារត្រឹមពាក់កណ្តាលខែនេះ គឺនៅថ្ងៃទី 18 ខែកុម្ភៈ បន្ទាប់ពីមានការរាយការណ៍មួយបានលើកឡើងថា លោក ថាក់ស៊ីន គឺមានសិទ្ធិទទួលបាននូវការលើកលែងទោសជាពិសេស នេះបើយោងតាមការចុះផ្សាយរបស់កាសែតបាងកកប៉ុស្តិ៍កាលពីថ្ងៃទី ០៧ ខែកុម្ភៈ ឆ្នាំ២០២៤។

ប្រភពខាងលើបាននិយាយទៀតថា DoC ខាងនាយកដ្ឋានរបស់ខ្លួនបានចងក្រងបញ្ជីអ្នកទោសដែលមានសិទ្ធិសម្រាប់ការដោះលែង និងការលើកលែងទោសពិសេស ដោយក្នុងនោះក៏មានឈ្មោះរបស់លោក ថាក់ស៊ីន ផងដែរ។ ប្រភពមួយនេះបាននិយាយបន្តទៀតថា ការទទួលបាននូវការលើកលែងទោសពិសេស ពួកគេនឹងផ្តល់ជូនដល់អ្នកទោសទាំងអស់ដែលមានអាយុលើសពី 70 ឆ្នាំ ឬអ្នកដែលមានជំងឺធ្ងន់ធ្ងរ និងពិការភាពជាដើម ។

គួររំលឹកថា បន្ទាប់ពីការនិរទេសខ្លួនឯងអស់រយៈពេល 15 ឆ្នាំកន្លងមក លោក ថាក់ស៊ីន បានវិលត្រឡប់មកប្រទេសថៃវិញនៅថ្ងៃទី 22 ខែសីហា ឆ្នាំ 2023 ដែលកាលនោះតុលាការកំពូលរបស់ថៃ បានកាត់ទោសគាត់ឱ្យជាប់ពន្ធនាគាររយៈពេលប្រាំបីឆ្នាំ ប៉ុន្តែក្រោយ​មកអ្នក​ទោសរូប​នោះ​ត្រូវ​បានព្រះមហាលក្សត្រទ្រង់ព្រះរាជទានទោសមកសល់ត្រឹមមួយឆ្នាំវិញ។

ប៉ុន្តែបើទោះជាយ៉ាងណាក៏ដោយ នៅយប់ដំបូងក្នុងពន្ធនាគារបាងកករបស់លោក ថាក់ស៊ីន ដែលជាអតីតនាយករដ្ឋមន្ត្រីរូបនេះក៏ត្រូវបានគេផ្ទេរទៅកាន់មន្ទីរពេទ្យទូទៅប៉ូលីសនៅយប់ថ្ងៃដដែល ដោយលើកពីហេតុផលមួយថា គាត់មានជំងឺធ្ងន់ធ្ងរ។

យ៉ាងណាមិញ សម្រាប់បញ្ជី​ឈ្មោះ​អ្នក​ទោស​ដែល​មាន​សិទ្ធិអាចទទួលបាននូវ​លើក​លែង​ទោសទាំងអស់នោះ ប្រភពខាងលើបាននិយាយថា ពួកគេត្រូវរង់ចាំការសម្រេចចិត្តចុងក្រោយដោយ​ក្រសួង​យុត្តិធម៌ជាមុនសិន។

ក្រុមហ៊ុន Samsung បានប្រកាសថា ប្រាក់ចំណេញរបស់ខ្លួនធ្លាក់ចុះអស់ប៉ុន្មានត្រីមាសជាប់ៗគ្នា គឺបន្ទាប់ពីការបិទបញ្ជីប្រចាំឆ្នាំកាលពីថ្ងៃពុធ។ ស្ថាបនិករបស់ក្រុមហ៊ុនមួយនេះបានសម្តែងការសោកស្តាយទៀតថា Samsung អាចនឹងបាត់បង់អតិថិជនបន្ថែមទៀត ខណៈដែលទូរស័ព្ទ Iphone  កាន់តែលេចធ្លោ។

គួរបញ្ជាក់ថា ក្រុមហ៊ុនបច្ចេកវិទ្យាយក្សរបស់កូរ៉េខាងត្បូងបានប្រកាសពីការធ្លាក់ចុះនៃប្រាក់ចំណេញប្រមាណ 35% កាលពីថ្ងៃពុធ ដែលជាសញ្ញាមួយបង្ហាញឲ្យយើងដឹងថា ការលក់ទូរស័ព្ទ Samsung អាចប្រឈមនឹងការធ្លាក់ចុះបន្ថែមទៀត។

យ៉ាងណាមិញ ខាងក្រុមហ៊ុនយក្សរបស់កូរ៉េខាងត្បូងមួយនេះបាននិយាយបន្តថា ប្រាក់ចំណេញរបស់ខ្លួនបានបន្តធ្លាក់ចុះរហូតមកនូវត្រឹម 2.8 ពាន់ពាន់លានវ៉ុន (ជិត 2.1 ពាន់លានដុល្លារ) តែប៉ុណ្ណោះកាលពីក្នុងត្រីមាសចុងក្រោយនៃឆ្នាំ២០២៣ ប្រសិនបើយើងធៀបទៅនឹងត្រីមាសដូចគ្នាកាលពីឆ្នាំ២០២២ ក្រុមហ៊ុនបានទទួលនូវប្រាក់ចំនេញប្រមាណ 4.3 ពាន់ពាន់លានវ៉ុន (3.5 ពាន់លានដុល្លារសហរដ្ឋអាមេរិក)ឯណោះ។

បើយោងតាមរយៈអ្នកនាំពាក្យរបស់ក្រុមហ៊ុនស្មាតហ្វូន Samsung បាននិយាយប្រាប់និយោគិនរបស់ខ្លួនថា ទីផ្សារស្មាតហ្វូនរបស់យើងនឹងងើបឡើងវិញនៅឆ្នាំ 2024 ជាពិសេសគឺជាមួយនឹងការចេញលក់ផលិតផលថ្មីៗ ដូចជាស្មាតហ្វូនដែលដំណើរការដោយ AI ជាដើម។

Samsung ដែលជាក្រុមហ៊ុនលក់ស្មាតហ្វូនឈានមុខគេរបស់ពិភពលោកជាយូរមកហើយនោះ ទីបំផុតវាក៏ត្រូវបានក្រុមហ៊ុន Apple វ៉ាដាច់ នៅក្នុងត្រីមាសទី 4 ដែលជាទូទៅមានអតិថិនជនជាច្រើនបានសម្រុកទិញiphone កាលពីពេលចុងឆ្នាំ។

តែប្រសិនបើយោងទៅតាម ក្រុមហ៊ុនស្រាវជ្រាវទីផ្សារ IDC បានសរសេរថា ក្រុមហ៊ុនផលិតទូរស័ព្ទ iPhone បានកាន់កាប់ 20.1% នៃចំណែកទីផ្សារនៅក្នុងពិភពលោកកាលពីឆ្នាំ 2023 ខណៈដែល Samsung មានត្រឹម 19.4% តែប៉ុណ្ណោះ ។

តែបើទោះបីជាក្រុមហ៊ុនកូរ៉េខាងត្បូងបានទទួលស្គាល់ការជ្រៀតចូលទៅក្នុងទីផ្សាពិភពលោករបស់ខ្លួន គឺមានកម្រឹតទាបជាង ក្រុមហ៊ុន Apple ក៏ពិតមែន ប៉ុន្តែស្ថាបនិករបស់ក្រុមហ៊ុនមួយនេះបានលើកឡើងថា ក្រុមហ៊ុន Samsung ពិតជាអាចប្រយុទ្ធប្រឆាំងរាល់បញ្ហាដែលកំពុងប្រឈមដោយជោគជ័យជាមិនខាន។

ប្រសិនបើយើងក៏ឡេកទៅមើលទីផ្សានាឆ្នាំ២០២៤ វាត្រូវបានក្រុមអ្នកជំនាញជាច្រើនបាននិយាយថាតម្រូវការនឹងងើបឡើងមកវិញជាបណ្តើរៗ ហេតុដូច្នេះហើយ Samsung នៅតែមានសង្ឈឹម ។ ម្យ៉ាងទៀតក្រុមអ្នកវិភាគក៏បានសង្កេតឃើញថា នៅដើមឆ្នាំ២០២៤ Samsung ហាក់ដូចជាមានសន្ទុះឡើងមកវិញបន្តិច បន្ទាប់ពីខ្លួនប្រកាសពីមុខងារ AI ថ្មីរបស់ខ្លួននោះ។

 ក្រុមហ៊ុន Samsung បានរំពឹងទុកទៀតថា ប្រាក់ចំណូលនៅក្នុងឆមាសទីមួយនៃឆ្នាំ 2024 អាចនឹងបង្ហាញពីការប្រសើរឡើងក្នុងកម្រិតមធ្យមថែមទៀតផង ហើយការកើនឡើងនោះនឹងបន្តរហូតដល់ឆមាសទីពីរនៃ ឆ្នាំ២០២៤ ផងដែរ។

វ៉ែនតា Apple Vision Pro ដែលជាផលិតផលថ្មីរបស់ Apple ប្រសិនបើយើងគិតត្រឹមរយៈពេលប្រាំពីរឆ្នាំចុងក្រោយ ហើយឥឡូវសារព័ត៌មានរបស់ CNN ចុះផ្សាយថា ក្រុមហ៊ុន Apple បានដាក់លក់ជាផ្លូវការសម្រាប់វ៉ែនតាបច្ចេកវិទ្យាចុងក្រោយរបស់ខ្លួន គឺនៅក្នុងសហរដ្ឋអាមេរិក កាលពីថ្ងៃសុក្រ។

វ៉ែនតាដែលគេស្គាល់ថាជា Vision Pro គឺមានលក់នៅទូទាំងហាងរបស់ Apple Stores ទូទាំងប្រទេស ខណៈដែលអ្នកដើរទិញឥវ៉ាន់កំពុងតែអន្ទះសារនិងចង់សាកល្បងនៅផលិតផលថ្មីរបស់ Apple បន្ទាប់ពីស្ថាបនិករបស់ក្រុមហ៊ុនមួយនេះបានសន្យាថា ខ្លួននិងផ្តល់ជូនដល់អតិថិជននូវផលិតផលមួយដែលពោពេញទៅដោយបច្ចេកវិទ្យាច្នៃប្រឌិតចុងក្រោយគេបំផុតក្នុងរយៈប៉ុន្មានឆ្នាំចុងក្រោយនេះ។

លោក Tim Cook ដែលជានាយកប្រតិបត្តិរបស់ Apple បានធ្វើការស្វាគមន៍ដល់អតិថិជនរបស់ខ្លួនដែលកំពុងរង់ចាំចូលហាង ដោយអមជាមួយនឹងការចាប់ដៃ ព្រមទាំងការថតរូប Selfie ជាដើម។ បើយោងតាមអ្នកសង្កេតការរបស់ CNN បានឲ្យដឹងទៀតថា កាលពីព្រឹកថ្ងៃសុក្រ គឺមានអតិថិជនប្រហែល ២០០នាក់បានតម្រុងជួរមុខហាង Flagship Store របស់ Apple មុនពេលហាងបើកដំណើរការថែមទៀតផង។

បើយោងទៅតាមការរៀបរាប់ពីនាយកប្រតិបត្តិ Tim Cook បាននិយាយជាយូរមកហើយអំពីសក្តានុពលសម្រាប់ការពិតបន្ថែម ដែលជាគោលបំណងនៃការបង្កើត Vision Pro គឺដើម្បីជួយដល់មនុស្សក្នុងការប្រាស្រ័យទាក់ទងគ្នាឲ្យកាន់តែងាយស្រួលជាងមុន។ ប៉ុន្តែឥឡូវនេះ គាត់ក៏បានបញ្ជាក់ទៀតថា Vision Pro វាគឺជាឧបករណ៍ដែលលាយបញ្ចូលទាំងការពិតបែបនិម្មិត និងការពិតបន្ថែមជាច្រើនទៀត ដែលជារឿងពិតនៃអនាគតរបស់កំព្យូទ័រ។

ការចេញលក់នូវផលិតផលថ្មីមួយនេះផងដែរ លោក Tim Cook បានហៅឧបករណ៍នេះថាជា “ឧបករណ៍អេឡិចត្រូនិកដែលទំនើបបំផុត ​និងមិនធ្លាប់មានពីមុនមក” ។

ទន្ទឹមនឹងមនុស្សជាច្រើននៅក្នុងពិភពលោកបានចាប់អារម្មណ៍មកលើផលិតផលថ្មីមួយនេះច្រើនយ៉ាងណាក៏ដោយ ប៉ុន្តែក្នុងនោះក្រុមអ្នកជំនាញផ្នែកទីផ្សានៅក្នុងពិភពលោកជាច្រើនបានលើកឡើងថា វាមិនមែនផលិតផលដែលងាយស្រួលក្នុងការលក់នោះទេ។

យ៉ាងណាមិញសម្រាប់តែវ៉ែនតាមួយគ្រឿង ដែលពាក់បានសម្រាប់តែមនុស្សម្នាក់ វាបែរជាមានតម្លៃរហូតដល់ទៅ $3,499 ខណៈដែលវ៉ែនតាមួយគ្រឿងវាមានសមត្ថភាពផ្ទុកទិន្នន័យត្រឹមតែ 256 GBតែប៉ុណ្ណោះ។

បើយោងទៅតាមកាសែត The New York Times បានរាយការណ៍ថា ដើម្បីទទួលបានការចាប់អារម្មណ៍ពីអតិថិជនទៅលើការបញ្ជាទិញនូវផលិតថ្មីរបស់ខ្លួនឲ្យកាន់តែច្រើន នាយកប្រតិបត្តិរបស់ក្រុមហ៊ុនមួយនេះបានប្រកាសពីអត្ថប្រយោជន៍ជាច្រើនដែលខ្លួនបានផ្តល់ជូនដល់អ្នកទិញដូចជា ការបញ្ចូលនូវគ្រឿងបន្លាស់បន្ថែមពីលើផលិតផល ការផ្តល់ជូនកាបូបធ្វើដំណើរដែលមានតម្លៃជាទឹកប្រាក់ 200 ដុល្លារ និងប្រអប់ដាក់ថ្មដែលមានតម្លៃស្មើនឹង 50 ដុល្លារ ព្រមទាំងវត្ថុអនុស្សាវរីយ៍ជាច្រើនមុខទៀត ដែលបូកបញ្ចូលទាំងផលិតផលគោលនិងអាចឈានដល់តម្លៃ 4,600 ដុល្លារ ។

បើយោងទៅតាមក្រុមការងាររបស់ CNN ដែលបានទៅសាកល្បងផលិតផលមួយនេះដោយផ្ទាល់បានឲ្យដឹងថា Vision Pro វាប្រៀបបានដូចជាវ៉ែនតាវេទមន្តមួយ ដែលផ្តល់ឲ្យយើងនូវវីដេអូដែលពោរពេញដោយភាពទាក់ទាញនិងរំភើបជាមួយនិងអ្វីដែលយើងកំពុងតែទស្សនា។

ការទទួលបាននូវបទពិសោធន៍ថ្មីជាលក្ខណៈ 3D វាពិតជាបានធ្វើឲ្យយើងទទួលបានអារម្មណ៍ថា យើងដូចជាស្ថិតក្នុងយានជំនិៈដែលតួរអង្គកំពុងតែជិៈ ហើយអ្វីដែលកាន់តែអស្ចារ្យអ្វីគ្រប់យ៉ាងដែលនៅក្នុងនោះ តួរអង្គដែលនៅក្នុងនោះវាហាក់ដូចជារូបយើងផ្ទាល់តែម្តង។