មានករណីបំផ្ទុះគ្រាប់បែកមួយបានកើតឡើងនៅភាគខាងត្បូងនៃប្រទេសថៃ ដែលបណ្តាលឲ្យមានមនុស្សម្នាក់បានបាត់បង់ជីវិតនិង 16 នាក់ផ្សេងទៀតបានរងរបួស។
គួរបញ្ជាក់ថា គ្រោះថ្នាក់ខាងលើនេះបានកើតឡើងកាលពីថ្ងៃអាទិត្យ នៅវេលាម៉ោង 10 និង 30 នាទីព្រឹក គឺស្ថិតនៅក្នុងក្រុងបានណាងសាតា ដែលមានចំងាយមិនឆ្ងាយប៉ុន្មានពីសាលាស្រុកបាណងសត នៃខេត្តព្រំដែនភាគខាងត្បូងប្រទេសថៃនោះទេ។
បើយោងតាមការរៀបរាប់ពីលោកឧត្តមសេនីយ៍ទោ Piyawat Chalermsri ស្នងការនគរបាលខេត្ត ភូមិភាគទី៩ បាននិយាយប្រាប់កាសែតបាងកកប៉ុស្តិ៍ថា គ្រាប់បែកដែលផ្ទុះនោះ វាគឺជាប្រភេទស៊ីឡាំងហ្គាស ដោយក្នុងនោះជនបង្កហេតុបានលួចពីភ្នាក់ងាររដ្ឋាភិបាលរបស់លោកកាលពីថ្ងៃសៅរ៍ តែនៅថ្ងៃអាទិត្យជនមិនស្គាល់សញ្ញាណនោះបានយកវាទៅដាក់នៅក្នុងរថយន្ត Toyota ពណ៌ខៀវមួយគ្រឿង ម្ល៉ោះហើយទើបធ្វើឲ្យការផ្ទុះនោះមានសភាពធ្ងន់ធ្ងរ។
គួររំលឹកថា នៅថ្ងៃដដែលនោះ ខាងរដ្ឋមន្ត្រីក្រសួងយុត្តិធម៌ លោកTawee Sodsong បានធ្វើការកំណត់អត្តសញ្ញាណថា អ្នកដែលបានបាត់បង់ជីវិតនោះ គាត់គឺជាគ្រូបង្រៀនម្នាក់ គឺឈ្មោះ Rokiyoh Sarana ភេទស្រី អាយុ 45 ឆ្នាំ ហើយក្នុងកំឡុងពេលនោះ គាត់កំពុងតែធ្វើដំណើរឆ្លងកាត់កន្លែងកើតហេតុ តែជាអកុសលនៅភ្លាមៗនោះគ្រាប់បែកក៏បានបំផ្ទុះឡើង។
លោក Tawee Sodsong បានបន្តទៀតថា ក្នុងចំណោមអ្នករបួសទាំង១៦នាក់ គឺមាន៦នាក់ជាមន្ត្រីប៉ូលិស និង១០នាក់ជាអ្នកស្រុក ហើយក្នុងចំណោមអ្នករបួសទាំងអស់គឺមាន ៥ នាក់បានរងរបួសធ្ងន់។ បច្ចុប្បន្នខាងក្រុមការងាររបស់លោកបានបញ្ជូនពួកគាត់ទៅកាន់បន្ទីពេទ្យដែលជិតជាងគេ គឺមន្ទីរពេទ្យ Bannangsata ។
ឧបទ្ទវហេតុនេះជាការបំផ្ទុះរថយន្តលើកដំបូងនៅភាគខាងត្បូងឆ្ងាយនៅឆ្នាំនេះ។
