Full Post Style

សាកសព​កម្មករ​ថៃ​ប្រមាណ ៨ នាក់ ដំបូង ​ដែល​បាន​ស្លាប់​ក្នុង​ប្រទេស​អ៊ីស្រាអែល បើគិត​ចាប់​តាំង​ពី​ការ​វាយ​ប្រហារដោយពួក​ក្រុម​ហាម៉ាស​កាល​ពី​ថ្ងៃ​ទី​៧ តុលាមក ត្រូវ​បាន​គេ​បញ្ជូន​មក​ប្រទេស​វិញ​តាម​ជើង​ហោះ​ហើរ​ពាណិជ្ជកម្ម​មួយ​នៅ​ព្រឹក​ថ្ងៃ​សុក្រ ហើយសាកសពរបស់ពួកគេទាំងនោះក៏​ត្រូវ​បាន​គេ​ដឹក​បន្ត​ទៅស្រុក​កំណើត​រៀង​ៗ​ខ្លួនផងដែរ នេះបើយោងតាមការចុះផ្សាយរបស់កាសែតបាងកកប៉ុស្តិ៍កាលពីថ្ងៃទី ២០ ខែតុលា ឆ្នាំ ២០២៣។

ជើងហោះហើរ El Al Flight LY083 បានហោះចេញពីប្រទេសអ៊ីស្រាអែល ដោយដឹកសាកសពបុរសជនជាតិថៃទាំងប្រាំបីនាក់នោះ និងបានចុះចតនៅអាកាសយានដ្ឋានសុវណ្ណភូមិ ក្នុងខេត្ត Samut Prakan នៅម៉ោង 9:33 នាទីព្រឹក។

ចំពោះមឈូស​ដែល​ផ្ទុក​អ្នក​ស្លាប់​ត្រូវ​បាន​គេ​យក​ទៅ​តម្កល់​នៅ​មុខ​ Free Zone នៃ​ការិយាល័យ​គយ​ខាង​ក្នុង​អាកាសយានដ្ឋាន​ដើម្បី​ធ្វើ​ពិធី​កាន់​ទុក្ខថែមទៀតផង។

លោក Pairote Chotikasathien លេខាធិការអចិន្ត្រៃយ៍ទទួលបន្ទុកការងារបាននិយាយកាលពីថ្ងៃសុក្រថាមន្ត្រីការងារនៅក្នុងខេត្តនៃអ្នកស្លាប់ទាំងនោះ ពួកគេនឹងទៅសួរសុខទុក្ខក្រុមគ្រួសាររបស់កម្មករដែលបានស្លាប់ហើយប្រាប់ពួកគេអំពីការផ្តល់ជូនរបស់រដ្ឋាភិបាលសម្រាប់ក្រុមគ្រួសារនៃជនរងគ្រោះនោះផងដែរ។

លោក​បាន​បន្ត​ថា​ដំបូង​ក្រសួង​ការងារ​នឹង​ផ្តល់​ប្រាក់​ចំនួន ៤០,០០០ បាត​ដល់​គ្រួសារ​នីមួយៗ​សម្រាប់​ថ្លៃ​ធ្វើ​បុណ្យ​សព។ ហើយក្រសួងនឹងសហការបន្ថែមទៀត ជាមួយអាជ្ញាធរអ៊ីស្រាអែលដើម្បីទទួលបានអត្ថប្រយោជន៍មរណភាពសម្រាប់គ្រួសារនីមួយៗ។ ចំពោះប្រពន្ធរបស់អ្នកស្លាប់ក៏នឹងទទួលបានប្រាក់ឈ្នួលប្រចាំខែចំនួន 40,000 បាតរហូតដល់រៀបការម្តងទៀត ហើយកូនរបស់ពួកគេម្នាក់ៗនឹងទទួលបានប្រាក់ខែពី 8,000 ទៅ 12,000 បាតក្នុងមួយខែរហូតដល់ពួកគេមានអាយុ 18 ឆ្នាំ។

លោក Pairote បាននិយាយថា ក្រសួងការងារបានបញ្ជូនទឹកផឹក និងអាហារស្ងួតប្រមាណ ៤,០០០ឈុត ដល់ពលករថៃដែលជាប់គាំងនៅក្នុងប្រទេសអ៊ីស្រាអែល។ លោកបានបន្ថែមថា ក្រសួងនឹងព្យាយាមធ្វើមាតុភូមិនិវត្តន៍ទាំងស្របច្បាប់ និងខុសច្បាប់ពលករថៃពីអ៊ីស្រាអែលឱ្យបានឆាប់តាមដែលអាចធ្វើទៅបាន។

លោក Pairote បាននិយាយថា ចំពោះកម្មករដែលត្រូវបានគេរាយការណ៍ថាបង្ខំឱ្យបន្តធ្វើការដោយនិយោជករបស់ពួកគេ បើទោះបីជាសង្រ្គាមកំពុងបន្តរវាងអ៊ីស្រាអែល និងក្រុមហាម៉ាសក៏ដោយ អនុព័ន្ធការងារនៅអ៊ីស្រាអែលត្រូវបានណែនាំឱ្យធ្វើអន្តរាគមន៍ ព្រោះទង្វើនេះគឺផ្ទុយនឹងច្បាប់។

តំណាង​ភាគី​ថៃ​ក្នុង​ពិធី​នោះ​មាន​លោក Pannabha Chandraramya ឯកអគ្គរាជទូត​ថៃ​ប្រចាំ​ប្រទេស​អ៊ីស្រាអែល លោក Naruchai Ninnart អគ្គនាយករង​នៃ​នាយកដ្ឋាន​កិច្ចការ​កុងស៊ុល និង​អនុព័ន្ធ​ការងារ​នៅ​ស្ថានទូត​ថៃ​ប្រចាំ​ប្រទេស​អ៊ីស្រាអែល។

មន្ត្រីជាន់ខ្ពស់អ៊ីស្រាអែលដែលចូលរួមក្នុងពិធីនេះរួមមានលោក Michael Ronen អគ្គនាយកនៃនាយកដ្ឋានអាស៊ី និងប៉ាស៊ីហ្វិក និងលោក Inbal Masashh ប្រធានរដ្ឋបាលពលករបរទេស។

ក្រសួងការពារជាតិអង់គ្លេសបាននិយាយកាលពីថ្ងៃសុក្រថា កងកម្លាំងអ៊ុយក្រែន “ទំនងជា” បានវាយប្រហារទៅលើឧបករណ៍ការពារដែនអាកាស និងឧទ្ធម្ភាគចក្ររបស់រុស្ស៊ី កាលពីដើមសប្តាហ៍នេះ នៅឯអាកាសយានដ្ឋាន Berdyansk និង Luhansk នេះបើយោងតាមការចុះផ្សាយរបស់ VOA កាលពីថ្ងៃទី ២០ ខែតុលា ឆ្នាំ ២០២៣។

បើយោងតាមរបាយការណ៍របស់ក្រសួងការពារជាតិរបស់ចក្រភពអង់គ្លេសបាននិយាយថា ឧទ្ធម្ភាគចក្រចំនួនប្រាំបួននៅ Berdyansk និង 5 គ្រឿងនៅ Luhansk “ទំនងជា” ត្រូវបានបំផ្លាញដោយសារតែកងទ័ពរបស់អ៊ុយក្រែន។

ចំណែកឯខាងប្រទេសអ៊ុយក្រែនវិញនិយាយថា ខ្លួនបានប្រើប្រាស់កាំជ្រួច ATACMS រយៈចម្ងាយឆ្ងាយ ដែលផ្តល់ដោយសហរដ្ឋអាមេរិក ជាលើកដំបូងក្នុងការវាយប្រហារខាងលើនេះ។

របាយការណ៍របស់ក្រសួងការពារជាតិរបស់ចក្រភពអង់គ្លេសបាននិយាយទៀតថា ប្រសិនរុស្ស៊ីហ៊ានបញ្ចេញនូវរបាយការណ៍នៃការខូចខាតលើកនេះវិញ  “ប្រាកដណាស់ទីក្រុងមូស្គូទំនងជាមានការខាតបង់ខ្លាំង ព្រោះថាវាពិតជាផលប៉ះពាល់ដល់សមត្ថភាពការពាជាតិររបស់ខ្លួន ម្យ៉ាងទៀតយើងអាចនិយាយបានថា ប្រទេសរុស្ស៊ីអាចនឹងមានការពិបាកក្នុងការស្វែងរកឧបករណ៍ការពារដែនអាកាសថ្មី ក៏ដូចជាឧទ្ធម្ភាគចក្រថ្មីមកជំនួសផងដែរ។

ប្រភពដដែលបាននិយាយថា ការបាត់បង់គ្រឿងបរិក្ខាររបស់រុស្ស៊ីលើកនេះ ទីក្រុងមូស្គូទំនងជាដាក់សម្ពាធកាន់តែខ្លាំងលើអាកាសយានិករុស្ស៊ីដែល “កំពុងតែរហត់នឿយក្នុងសមរភូមិ ក៏ដូចជាបញ្ហាថែទាំជាដើម ព្រោះយុទ្ធនាការរបស់លោក ពូទីន មួយនេះ ត្រូវបានអូសបន្លាយលើសពីការរំពឹងទុក”។

ទន្ទឹមនឹងនេះ ប្រធានាធិបតីអ៊ុយក្រែនលោក Volodymyr Zelenskyy បាននិយាយនៅក្នុងសុន្ទរកថាប្រចាំថ្ងៃរបស់លោកថា លោកបានពិភាក្សាជាមួយប្រធានាធិបតីអាមេរិកលោក Joe Biden កាលពីថ្ងៃព្រហស្បតិ៍រួចរាល់ ដោយក្នុងនោះយើងបានសង្កត់ធ្ងន់ទៅលើរបៀបដែលមីស៊ីលអាចជួយ “បង្កើនល្បឿន” គឺមានន័យថា ការជួយរំដោះអ៊ុយក្រែនពីចេញពីការបង្កសង្គ្រាមរបស់រុស្ស៊ី។ តែទោះជាយ៉ាងណាក្តី ពួកយើងទាំងពីរក៏បាននិយាយអំពីស្ថានភាពនៅមជ្ឈិមបូព៌ាផងដែរ។

នៅក្នុងសន្ទកថាដដែលនោះ លោក Zelenskyy បានលើកយកប្រធានបទ អំពីជម្លោះក្នុងប្រទេសអ៊ីស្រាអែលយកមកនិយាយថា “មិនថាមានរឿងអ្វីកើតឡើងនោះទេ ភាគីទាំងអស់ត្រូវតែធានាថា ជនស៊ីវិលធម្មតាគឺអាចទទួលបានជំនួយជានិច្ច ។

មន្ត្រីអាមេរិកពីររូបបានប្រាប់ CNN ថា នាវាចម្បាំងរបស់កងទ័ពជើងទឹកអាមេរិកមួយគ្រឿង ដែលប្រតិបត្តិការនៅតំបន់មជ្ឈិមបូព៌ា គឺចតនៅក្បែរឆ្នេរសមុទ្រមួយនៃប្រទេសយេម៉ែន កាលពីថ្ងៃព្រហស្បតិ៍ ហើយវាបានស្ទាក់ចាប់គ្រាប់មីស៊ីលជាច្រើនគ្រាប់ នេះបើយោងតាមការរាយកាណ៍របស់ CNN កាលពីថ្ងៃទី ១៩ ខែតុលា ឆ្នាំ២០២៣។

បើយោងតាមមន្ត្រីរបស់សហរដ្ឋអាមេរិកម្នាក់បាននិយាយថា កាំជ្រួចត្រូវបានបាញ់ដោយក្រុមសកម្មប្រយុទ្ធ Houthi ដែលគាំទ្រដោយអ៊ីរ៉ង់ ខណៈដែលពួកកំពុងតែព្យាយាមចង់ចូលរួមក្នុងជម្លោះដែលកំពុងតែបន្តនៅក្នុងប្រទេសយេម៉ែន។ បើយោងតាមមន្ត្រីដែលសុំមិនបញ្ចេញឈ្មោះទាំងទី 2 នាក់នោះបានឱ្យដឹងទៀតថា កាំជ្រួចប្រហែល 2-3 គ្រាប់ត្រូវបានកងទ័ពជើងទឹករបស់សហរដ្ឋអាមេរិកស្ទាក់ចាប់បាន។

បើយោងតាមអ្នកយកការណ៍របស់ CNN បាននិយាយថា នាវា USS Carney បានឆ្លងកាត់ព្រែកជីក Suez ចូលទៅក្នុងសមុទ្រក្រហមកាលពីថ្ងៃពុធ។ ហើយមេបញ្ជាការកងនាវាចរអាមេរិកបាននិយាយនៅក្នុងការបង្ហោះប្រព័ន្ធផ្សព្វផ្សាយសង្គមថា វានឹង “ជួយធានាសន្តិសុខ និងស្ថិរភាពដែនសមុទ្រនៅមជ្ឈិមបូព៌ាតែមួយគត់”។

កាលពីថ្ងៃព្រហស្បតិ៍នេះផងដែរ បើយោងតាម លោកឧត្តមសេនីយ Pat Ryder ដែលធ្វើការនៅទីស្តីការ​មន្ទីរ​បញ្ចកោណវិញ បានបញ្ជាក់ថា USS Carney បានបាញ់ទម្លាក់កាំជ្រួចវាយប្រហារដីចំនួនបីគ្រាប់ ក៏ដូចជាយន្តហោះគ្មានមនុស្សបើកជាច្រើនគ្រឿង ដែលបានបាញ់ប្រហារដោយកងកម្លាំង Houthi វាគឺជាក្រុមដែលគាំទ្រដោយអ៊ីរ៉ង់ដែលស្ថិតនៅក្នុងប្រទេសយេម៉ែន។

គួរបញ្ជាក់ថា ហ៊ូទីស គឺជាអង្គការនយោបាយផង និងជាក្រុមប្រដាប់អាវុធអ៊ីស្លាមនិយមផង ក្រុមនេះវាបានកើតចេញពីអភិបាលខេត្ត Saada ក្នុងប្រទេសយេម៉ែន កាលពីក្នុងទសវត្សរ៍ឆ្នាំ 1990 ។ បច្ចុប្បន្ន Houthi ក៏ត្រូវបានគេហៅឈ្មោះថាជាកម្លាំង Zaidi Shia ដែលជាការដឹកនាំដោយកុលសម្ព័ន្ធ Houthi ។

បើយោងតាមការរៀបរាប់របស់លោក Pat Ryder បាននិយាយនៅក្នុងសន្និសីទសារព័ត៌មានមួយថា “សកម្មភាពបាញ់ប្រហាររបស់ពួក Houthi គឺជាការបង្ហាញមួយឲ្យយើងដឹងថា ស្ថាបត្យកម្មការពារដែនអាកាស និងកាំជ្រួចរួមបញ្ចូលគ្នាដែលយើងបានសាងសង់នៅមជ្ឈិមបូព៌ានាពេលនេះ យើងត្រូវតែត្រៀមខ្លួនប្រើប្រាស់វានៅពេលណាមួយដែលចាំបាច់ ដើម្បីការពារដៃគូរបស់យើង ក៏ដូចជាពិភពលោកទាំងមូល។ យើងត្រូវតែការពារជីវិតមនុស្ស តែក៏”មិនត្រូវឲ្យមានការស្លាប់ និងរបួសដល់កងកម្លាំងអាមេរិកនោះដែរ”។

លោក Ryder បាននិយាយថា មន្ទីរបញ្ចកោណមិនអាចនិយាយឱ្យប្រាកដបានទេនៅចំណុចនេះថា តើមីស៊ីល និងយន្តហោះគ្មានមនុស្សបើក កំពុងតម្រង់ទៅគោលដៅអ្វីនោះ ប៉ុន្តែខ្ញុំសូមអះអាងថា ការបាញ់ប្រហារទាំងនោះ គឺត្រូវបានគេបាញ់ចេញពីប្រទេសយេម៉ែន ហើយកំពុងធ្វើដំណើរឆ្ពោះទៅភាគខាងជើងតាមបណ្តោយសមុទ្រក្រហម បើយោងតាមអ្នកជំនាញបានព្យាករណ៍ថា “វាមានសក្តានុពលឆ្ពោះទៅរកគោលដៅក្នុងប្រទេសអ៊ីស្រាអែល”។

លោក Ryder បាននិយាយថា ខាងមន្ទីបញ្ចកោណក៏ធ្លាប់បានធ្វើការហៅទូរស័ព្ទជាបន្តបន្ទាប់ជាមួយមេដឹកនាំអារ៉ាប់ រួមទាំង Sheikh Mohamed bin Zayed ដែលមកពីប្រទេសអារ៉ាប់រួម និង លោក Emir Sheikh Tamim មកពីប្រទេសកាតា ព្រមទាំងព្រះអង្គម្ចាស់ Khalid bin Salman ដែលមកពីប្រទេសអារ៉ាប៊ីសាអូឌីត ផងដែរ។ លោក Pat Ryder បាននិយាបន្តទៀតថា ការហៅទូរស័ព្ទនេះ ពួកយើងមានគោលដៅតែមួយគត់ គឺដើម្បីបញ្ជាក់ឡើងវិញនូវការគាំទ្ររបស់សហរដ្ឋអាមេរិកចំពោះប្រទេសអ៊ីស្រាអែល និងដើម្បីបញ្ជាក់ពីសារៈសំខាន់នៃការការពារជនស៊ីវិល។

លោក Ryder បាននិយាយទៀតថា “គាត់បានសង្កត់ធ្ងន់ម្តងទៀតថា ប្រសិនបើប្រទេសណាមួយ ឬក្រុមណាមួយដែលគិតចង់ទាញយកប្រយោជន៍ពីស្ថានភាពនៅក្នុងប្រទេសអ៊ីស្រាអែល គឺដើម្បីព្យាយាមពង្រីកជម្លោះនោះ អ្នកគួរតែគិតឲ្យបានពីរដងជាមុនសិន ហើយក៏សូមឲ្យអ្នកដែលបានប្រព្រឹតនោះមានការសង្ស័យណាមួយឲ្យសោះ ប្រសិនមានការដោះស្រាយដោយសហរដ្ឋអាមេរិក” ។

សហរដ្ឋអាមេរិកបានលើកទឹកចិត្តប្រទេសឥណ្ឌា ឱ្យធ្វើការឆ្ពោះទៅរកការផ្តល់ការការពារផ្លូវច្បាប់ស្មើៗគ្នាដល់គូស្នេហ៍ភេទដូចគ្នា និងកំពុង “តាមដានយ៉ាងដិតដល់នូវជំហ៊ានបន្ទាប់” របស់រដ្ឋាភិបាលឥណ្ឌា គឺបន្ទាប់ពីតុលាការកំពូលរបស់ប្រទេសមួយនេះបានបដិសេធ ភាពស្របច្បាប់ចំពោះអ្នកស្រឡាញ់ភេទដូចគ្នា នេះ​បើ​តាម​ក្រសួង​ការ​បរទេស​អាមេរិក​បាន​និយាយ​កាល​ពី​ថ្ងៃ​ព្រហស្បតិ៍ ទី ១៩ ខែតុលា ឆ្នាំ ២០២៣។

តុលាការកំពូលរបស់ប្រទេសឥណ្ឌាកាលពីថ្ងៃអង្គារ បានបដិសេធមិន ធ្វើច្បាប់អាពាហ៍ពិពាហ៍ភេទដូចគ្នា ហើយថែមទាំងទុករឿងនេះឱ្យសភាជាអ្នកសម្រេចថែមទៀតផង យ៉ាងណាមិញវាត្រូវតែឆ្លងកាត់ការយល់ព្រមជាមួយរដ្ឋាភិបាលខ្លួន គឺលោកនាយករដ្ឋមន្ត្រី Narendra Modi ។

ដីកាជាឯកច្ឆ័ន្ទដោយកៅអីចៅក្រមចំនួនប្រាំនាក់បានកើតឡើង ហើយវាក៏ជាការខកចិត្តយ៉ាងខ្លាំងចំពោះសហគមន៍ LGBTQ ដ៏ធំនៅក្នុងប្រទេសដែលមានប្រជាជនច្រើនជាងគេលើពិភពលោក។ នៅក្នុងករណីនេះវាបានកើតប្រាំឆ្នាំមកហើយ បន្ទាប់ពីតុលាការបានលុបចោលបម្រាមសម័យអាណានិគមលើការរួមភេទជាមួយមនុស្សស្រឡាញ់ភេទដូចគ្នា។

អ្នក​នាំ​ពាក្យ​ក្រសួង​ការ​បរទេស​សហរដ្ឋ​អាមេរិក​បាន​និយាយ​ថា៖ «សហរដ្ឋ​អាមេរិក​គាំទ្រ​សមភាព​អាពាហ៍ពិពាហ៍​ជា​សាកល»។ ម្យ៉ាងទៀត«យើងកំពុងតាមដានយ៉ាងដិតដល់នូវជំហ៊ានបន្ទាប់របស់រដ្ឋាភិបាលឥណ្ឌា ព្រមទាំងប្រតិកម្មពីសង្គមស៊ីវិលលើបញ្ហានេះ បន្ទាប់ពីសេចក្តីសម្រេចរបស់តុលាការត្រូវបានប្រកាស»។

បើយោងតាមការឆ្លើយតបពីខាង រដ្ឋបាលគណបក្ស Bharatiya Janata Party (BJP) ជាតិនិយមរបស់លោក Modi វិញ បានបកស្រាយថា ការរៀបការភេទដូចគ្នាគឺមិនអាចប្រៀបធៀបបានជាមួយនឹងគោលគំនិតគ្រួសារឥណ្ឌា ដែលមានប្តី ប្រពន្ធ និងកូន នោះទេ។

ចំនែកឯអ្នកនាំពាក្យក្រសួងការបរទេសរបស់សហរដ្ឋអាមេរិកបាននិយាយថា “យើងនឹងបន្តគាំទ្រចំពោះសមភាពអាពាហ៍ពិពាហ៍ និងការការពារសម្រាប់មនុស្ស LGBTQI+( Lesbian, Gay, Bisexual, Transgender, Queer, and Intersex ) ប្រឆាំងនឹងការរើសអើង និងលើកទឹកចិត្តឱ្យរដ្ឋាភិបាលឥណ្ឌាចាត់វិធានការចាំបាច់ដើម្បីផ្តល់ការការពារស្របច្បាប់ស្មើៗគ្នាដល់គូស្នេហ៍ភេទដូចគ្នា”។

យ៉ាងណាមិញចំពោះប្រធានចៅក្រមនៃប្រទេសឥណ្ឌា លោក DY Chandrachud បាននិយាយកាលពីថ្ងៃអង្គារថា តុលាការកំពូល “មិនអាចបង្កើតច្បាប់បានទេ ហើយវាគ្រាន់តែអាចបកស្រាយឲ្យសមស្របតែប៉ុណ្ណោះ។”

គួរបញ្ជាក់ថា អាស៊ី គឺជាទ្វីបដែលមានតម្លៃអភិរក្ស ដែលតែងតែគ្របដណ្ដប់លើសង្គមក្នុងប្រទេសជាច្រើន ហើយភាគច្រើនរូបភាពដែលកើតឡើងទាំងនោះ គឺវាកើតឡើងពីក្រោយពួកលោកខាងលិចក្នុងការទទួលយកអាពាហ៍ពិពាហ៍ភេទដូចគ្នា។

បើទោះជាយ៉ាងណាក្តី ខាងក្រសួងការបរទេសសហរដ្ឋអាមេរិកបាននិយាយថា ខ្លួននឹងចូលរួមជាទៀងទាត់ជាមួយរដ្ឋាភិបាលឥណ្ឌាលើការព្រួយបារម្ភអំពីសិទ្ធិមនុស្ស រួមទាំងសិទ្ធិអ្នកស្រឡាញ់ភេទដូចគ្នាផងដែរ។ ព្រោះថាបើយោងតាមរបាយការណ៍របស់ក្រសួងការបរទេសពីមុនបាន លើកឡើងពីការព្រួយបារម្ភ  នៃការប្រព្រឹត្តចំពោះជនជាតិភាគតិចសាសនា អ្នកកាសែត និងអ្នកប្រឆាំងនៅក្នុងប្រទេសឥណ្ឌា។ ប៉ុន្តែការលើកឡើងនេះ ត្រូវបាន ទីក្រុងញូវដែលី បដិសេធ ថាប្រទេសខ្លួនគ្មានការរើសអើងបែបនេះទេ។