ការផ្ទុះអាវុធអស់ជាច្រើនសប្តាហ៍នៅទូទាំងព្រុំដែនប្រទេសលីបង់ និងអ៊ីស្រាអែល វាកាន់តែរីករាលដាលឡើង ហើយវាក៏បង្ករឲ្យមានការកើនឡើងនៃចំនួនអ្នកស្លាប់ និងរបួសទាំងសងខាងដូចគ្នា បើសង្គ្រាមនៅតែបន្តរមិនឈប់ឈរពីមួយថ្ងៃទៅមួយថ្ងៃ ក៏ព្រោះតែគ្មាននរណាម្នាក់អាចហាមឃាត់ជម្លោះ រវាងអ៊ីស្រាអែល និងក្រុមហេសបូឡាហ៍លីបង់ ដែលគាំទ្រដោយ អ៊ីរ៉ង់ បាននៅឡើយ។
មានប្រភពមួយបាននិយាយប្រាប់រ៉យទ័រកាលពីថ្ងៃទី ១៣ ខែវិច្ឆិកាថា ខាងអ៊ីស្រាអែលបានបើកការវាយប្រហារដោយកាំជ្រួចទៅលើក្រុមសកម្មប្រយុទ្ធ Hezbollah កាលពីថ្ងៃអាទិត្យ ហើយវាបានធ្វើឱ្យកម្មករជាច្រើននាក់ដែលមកពីក្រុមហ៊ុន Israel Electric Company បានរងបួសអស់ជាច្រើននាក់ និងមានការស្លាប់ម្នាក់។
ក្រុមអ្នកយកការណ៍របស់រ៉យទ័របានរាយការណ៍ទៀតថា នៅក្នុងតំបន់ព្រុំប្រទល់នៃប្រទេសទាំងពីរនាពេលឥឡូវនេះ វាបានផ្ទុះឡើងនូវអំពើហឹង្សាដ៏សាហាវបំផុត បើយើងគិតចាប់តាំងពីអ៊ីស្រាអែល និងហេសបូឡាបានប្រយុទ្ធគ្នាក្នុងសង្គ្រាមរយៈជាច្រើនសប្តាហ៍កន្លងមកនេះ។ ដោយក្នុងនោះមានយុទ្ធជនហេសបូឡាជាង 70 នាក់ និងជនស៊ីវិល ប្រមាណជាង 10 នាក់ត្រូវបានគេសម្លាប់នៅក្នុងប្រទេសលីបង់ ហើយមានមនុស្ស 10 នាក់ផ្សេងទៀត រួមទាំងទាហ៊ានលីបង់ចំនួន 7 នាក់ គឺត្រូវបានគេសម្លាប់នៅក្នុងទឹកដីអ៊ីស្រាអែល ខណៈដែលមនុស្សរាប់ពាន់នាក់នៅតាមតំបន់ព្រុំដែនទាំងសងខាងកំពុងតែព្យាយាមរត់គេចពីគ្រាប់បែក។
បើទោះជាយ៉ាងណាក៏ដោយ ក៏ទាហ៊ានរបស់អ៊ីស្រាអែលនៅតែនិយាយថា ខ្លួនមិនចង់ធ្វើសង្រ្គាមនៅផ្នែកខាងមុខភាគខាងជើងនោះទេ ការដែលយោធារបស់ខ្លួនបើកការបាញ់ប្រហារបែបនេះ ក៏ព្រោះតែពួកយើងចង់ស្វែងរកក្រុមហាម៉ាស់ដែលស្ថិតនៅតំបន់ហ្គាហ្សាស្ទ្រីបតែប៉ុណ្ណោះ ប៉ុន្តែវាដោយតែមានការចូលរួមពីក្រុមហេសបូឡា ដែលពួកគេមានចេតនាឲ្យកងកម្លាំងអ៊ីស្រាអែលជាប់រវល់នឹងពួកគេនៅមួយផ្សេងទៀត តែយើងនៅតែអាចធ្វើសង្គ្រាមបានទាំងអស់។
ចំពោះចម្លោះដ៏ធំមួយនេះផងដែរ បើយើងក្រឡែកទៅមើលសហរដ្ឋអាមេរិកវិញ មន្ត្រីនៃប្រទេសមហាអំណាចមួយនេះបាននិយាយថា ខ្លួនមិនចង់ឱ្យជម្លោះរីករាលដាលនៅជុំវិញតំបន់នោះទេ ព្រោះថាបច្ចុប្បន្នក្រសួងការពារជាតិរបស់អាមេរិក បានចាប់ផ្តើមបញ្ជូននាវាផ្ទុកយន្តហោះចំនួនពីរគ្រឿងទៅកាន់តំបន់មជ្ឈឹមបូព៌ា ដើម្បីរារាំងការលូកដៃពីសំណាក់ប្រទេសអ៊ីរ៉ង់ ប៉ុន្តែផ្ទុយទៅវិញអាមេរិកគ្មានលទ្ធភាពក្នុងការបញ្ឈប់ការកើនឡើងនូវវោហារសាស្ត្រពីក្រុមហេសបូឡា និងអ៊ីស្រាអែលបាននោះទេ។
ព្រោះបើយោងតាមមេដឹកនាំក្រុម Hezbollah លោក Sayyed Hassan Nasrallah បាននិយាយកាលពីថ្ងៃសៅរ៍ថា រណសិរ្សលីបង់នឹង “នៅតែបន្តសកម្មភាព” តែមិនមែនជាការប្រយុទ្ធធម្មតានោះទេ មានន័យថា ក្រុមរបស់លោកនឹង “កែលម្អបរិមាណ” ដើម្បីបន្ថែមល្បឿននៃប្រតិបត្តិការឲ្យកាន់តែខ្លាំងក្លាជាងនេះទៅទៀត។
រីឯនាយករដ្ឋមន្ត្រីអ៊ីស្រាអែលវិញ លោក Benjamin Netanyahu បានព្រមានក្រុម Hezbollah កាលពីថ្ងៃច័ន្ទថា កុំឱ្យពង្រីកការវាយប្រហារមកលើអ៊ីស្រាអែលឲ្យសោះ ប្រសិនបើអ្នកមិនចង់រលាក។ គាត់បាននិយាយនៅក្នុងសេចក្តីថ្លែងការណ៍មួយថា “ក្រុម Hezbollah នៅពេលនេះកំពុងតែលេងជាមួយភ្លើង។ ហើយភ្លើងមួយនេះនឹងត្រូវបានឆ្លើយតបដោយអណ្តាតភ្លើងកាន់តែខ្លាំងជាងមុនទៅទៀត។ លោកបានបន្តទៀតថា អ្វីដែលយើងធ្លាប់បានបង្ហាញពីមុនមក វាគ្រាន់តែជាការសាកល្បងនោះទេ ព្រោះកំលាំងទាំងនោះវាមានលក្ខណៈតិចតួចតែប៉ុណ្ណោះ” ។
នៅពេលដែលក្រុមអ្នកសារព័ត៌មានសួរនៅក្នុងសន្និសីទសារព័ត៌មានកាលពីថ្ងៃសៅរ៍ អំពីអ្វីដែលជាបន្ទាត់ក្រហមរបស់អ៊ីស្រាអែល? ពេលនោះរដ្ឋមន្ត្រីការពារជាតិអ៊ីស្រាអែលលោក Yoav Gallant បានឆ្លើយថា “ប្រសិនបើអ្នកឮពាក្យមួយឃ្លាថា អ៊ីស្រាអែលបានវាយប្រហារទីក្រុង Beirut តើអ្នកនឹងយល់ថាលោក Hassan Nasrallah អាចឆ្លងកាត់បន្ទាត់នោះបានដែរឬមួយក៏អត់” ។
