Full Post Style

ក្រុមហ៊ុនធំៗនៅក្នុងពិភពលោកជាច្រើន ដូចជា Apple IBM និង Disney បានប្រកាសស្រដៀងគ្នាកាលពីថ្ងៃសុក្រថា ពួកគេនឹងផ្អាកការផ្សាយពាណិជ្ជកម្មនៅលើប្រព័ន្ធ X ដែលពីមុនយើងស្គាល់ថាជា Twitter គឺនៅពីរថ្ងៃបន្ទាប់ពីលោក Elon Musk  បានសរសេរបង្ហោះថា រូបលោកគឺជាមនុស្សម្នាក់ដែលគាំទ្រនូវទ្រឹស្តី Pizzagate  ដោយលោកបាននិយាថា សហគមន៍ជ្វីហ្វបានជំរុញ “ឲ្យមានការស្អប់ខ្ពើម ពួកជនជាតិស្បែកស”  វាគឺជា “រឿងពិត” នេះបើយោងតាមការចុះផ្សាយរបស់ CNN កាលពីថ្ងៃទី ២៣ ខែវិច្ឆិកា​ ឆ្នាំ២០២៣។

 ការចោទប្រកាន់ដោយគ្មានអំណះអំណាងរបស់លោក Elon Musk គឺបានធ្វើឲ្យខាងសេតវិមានមានប្រតិកម្មយ៉ាងខ្លាំង ព្រមទាំងបានធ្វើការថ្កោលទោសទៅលើមហាលសេដ្ឋីរូបនោះនៅព្រឹកថ្ងៃពុធថែមទៀតផង។ នៅក្នុងថ្ងៃនោះដដែល បើយោងតាមអ្នកនាំពាក្យរបស់សេតវិមានបាននិយាយប្រាប់ CNN ថា រាល់បុគ្គលិកនៅដែលបម្រើការនៅក្នុងសេតវិមានទាំងអស់ បានជ្រើសរើសយក Threads ដែលជាប្រព័ន្ធមួយស្ថិតក្នុងការគ្រប់គ្រងរបស់ក្រុមហ៊ុន Meta មកប្រើប្រាស់ជំនួស X ថែមទៀតផង ។

បើយោងតាមអ្នកនាំពាក្យរបស់ក្រុមហ៊ុន IBM វិញបាននិយាយថា “ក្រុមហ៊ុនរបស់ពួកគេនឹង មិនមានការអត់ឱនចំពោះការនិយាយស្អប់ និងការរើសអើងពីនាយកប្រតិបត្តិ របស់ X ជាដាច់ខាត។ ហើយពួកយើងក៏ផ្អាកការផ្សាយពាណិជ្ជកម្មទាំងអស់នៅលើប្រព័ន្ធសង្គម X ភ្លាមៗតែម្តង។

ចំនែកឯក្រុមហ៊ុនផលិតទូរស័ព្ទ iPhone ដែលជាក្រុមហ៊ុនយក្សនៅក្នុងពិភពលោក ហើយក៏ជាអ្នកដែលផ្សាយពាណិជ្ជកម្មធំបំផុតរបស់បណ្តាញសង្គម X ដោយមានការចំណាយប្រាក់ប្រមាណ $100​ លានដុល្លាក្នុងមួយឆ្នាំ នេះបើយើងគិតត្រឹមខែវិច្ឆិកា ឆ្នាំ 2022។ ប៉ុន្តែនៅពេលដែល លោក Musk បានសរសេរបង្ហោះបែបរើសអើងសាសនាបែបនេះ ក្រុមហ៊ុន Apple ក៏សម្រេចចិត្តមិនសហការជាមួយនឹងក្រុមហ៊ុន X បន្តទៀតដែរ។

គួរបញ្ជាក់ថាការចាកចេញរបស់អ្នកផ្សាយពាណិជ្ជកម្ម វាកំពុងបង្ហាញថា ក្រុមហ៊ុន X បានជួបវិបត្តិកាន់តែស៊ីជម្រៅ ចាប់តាំងពីវាត្រូវបានកាន់កាប់ដោយលោក Musk។ បើយោងតាម ​​Bloomberg បានឲ្យដឹងទៀតថា បន្ទាប់ពីមហាលសេដ្ឋីរូបនេះបានទិញយកនូវប្រព័ន្ធ X (ដែលដំបូងឡើយជាTwitter) តួរលេខអ្នកប្រើប្រាស់គឺកាន់តែធ្លាក់ចុះជាលំដាប់ ហើយបុគ្គលិកវិញក៏ត្រូវបានកាត់បន្ថយជិត ៥០% ថែមទៀតផង។

បើទោះជាយ៉ាងណាក៏ដោយខាងក្រុម X បាន អំពាវនាវដល់ដៃគូផ្សាយពាណិជ្ជកម្មរបស់ខ្លួន ឱ្យជួយការពារអ្វីដែលហៅថា “សេរីភាពនៃការនិយាយ” ។ ម្យ៉ាងវិញទៀតក្រុមហ៊ុនមួយនេះ កាលពីថ្ងៃច័ន្ទបានដាក់ពាក្យបណ្តឹងចោទប្រកាន់ Media Matters ពីបទបង្ហាញមាតិកាជ្រុលនិយមនៅលើគេហទំព័រ។ ក្រុមហ៊ុន X ក៏បាននិយាយផងដែរថា ខ្លួនបានធ្វើឱ្យគណនីគាំទ្រណាស៊ីដែលកំណត់ដោយ Media Matters មិនមានសិទ្ធិក្នុងការរកប្រាក់ ជាមួយនឹងក្រុមហ៊ុនរបស់ពួកគេផងដែរ។

បច្ចុប្បន្នមានអ្នកផ្សាយពាណិជ្ជកម្មមួយចំនួនក៏នៅតែបន្តសហការជាមួយ X បើទោះបីជាពួកគេមានការព្រួយបារម្ភអំពីការរិៈរបស់អ្នកប្រើប្រាស់នៅក្នុងប្រព័ន្ធមួយនេះក៏ដោយ។ ហើយចំនែកឯសម្ព័ន្ធកីឡាបាល់ទាត់ជាតិ ដែលជាដៃគូផ្សាយពាណិជ្ជកម្មដ៏ធំបំផុតមួយរបស់វេទិកា X នេះវិញ បានប្រាប់ CNN កាលពីថ្ងៃអង្គារ ថា ខ្លួនមានការព្រួយបារម្ភម្តងហើយម្តងទៀតអំពីពាក្យសម្ដីស្អប់ខ្ពើមចំពោះថ្នាក់ដឹកនាំ X ខ្លាំងណាស់ បើទោះបីជាយើងមិនអាចដកការចំណាយរបស់ខ្លួនចេញពីវេទិកាមួយនេះក៏ដោយ។

រចនាបថមួយដ៏ថ្មីសាឡាង ហើយវាក៏ជាផ្នែកមូលដ្ឋានមយយនៃយន្តហោះពាណិជ្ជកម្ម។ បើយោងតាមការរាយការណ៍ពីទីភ្នាក់ងាររបស់ CNN បាននិយាយថា ក្រុមហ៊ុនអាកាសចរណ៍ដែលទំនើប និងមានឈ្មោះល្បីដូចជា Boeing 787 និង Airbus A350 ពួកវាសុទ្ធសឹងតែមានរូបរាងទូទៅដូចគ្នាទៅនឹងយន្តហោះ Boeing 707 និង Douglas DC-8 ដែលត្រូវបានសាងសង់នៅចុងទសវត្សរ៍ឆ្នាំ 1950 ដោយក្នុងនោះស្ថបនិកនៃក្រុមហ៊ុនមួយនេះគ្រាន់តែបានពង្រឹងទម្រង់ “tube and wing”  របស់វាថែមតិចតួចតែប៉ុណ្ណោះ។

ភាពលេចធ្លោរបស់ក្រុម Boeing  គឺដោយសារតែស្ថាបនិកនៃក្រុមហ៊ុនមួយនេះ តែងតែផ្តល់អាទិភាពលើសុវត្ថិភាពខ្ពស់ជាងអ្វីៗទាំងអស់ ជាឧទាហរណ៍ដូចជាការប្រើប្រាស់៖ សម្ភារៈ និងម៉ាស៊ីន ជាដើម។

ទោះជាយ៉ាងណាក៏ដោយ ដោយសារឧស្សាហកម្មនេះកំពុងស្វែងរកវិធីកាត់បន្ថយការបញ្ចេញកាបូនយ៉ាងអស់សង្ឃឹម វាបានធ្វើឲ្យក្រុមហ៊ុនប្រឈមមុខនឹងបញ្ហាពិបាកជាងវិស័យផ្សេងទៀតយ៉ាងជាក់លាក់។ ព្រោះបើយោងតាមក្រុមបច្ចេកវិទ្យាស្នូលរបស់ក្រុមហ៊ុនបានបង្ហាញឱ្យឃើញថា ផលវិបាកនៃការកាត់បន្ថយការបញ្ចេញកាបូន វានឹងធ្វើឲ្យយន្តមិនមានលទ្ធភាពហោះហើរបានឆ្ងាយឡើយ។

យ៉ាងណាមិញសម្រាប់សំណើមួយដោយស្តីអំពី “រូបរាងថ្មីនៃស្លាបយន្តហោះ” វាក៏ដូចជារូបរាងថ្មីរបស់យន្តហោះដែរ។ ម្យ៉ាងវិញទៀត រចនាបថថ្មីនៃស្លាបយន្តហោះមួយនេះគឺថ្មីស្រុងសម្រាប់ប្រភេទយន្តហោះដែលជាប្រភេទទេសចរណ៍ ជាពិសេសមានមនុស្សជាច្រើនបាននិយាយថា រូបរាងថ្មីមួយនោះ វាពិតជាស្រដៀងនឹងយន្តហោះយោធាខ្លាំងណាស់ឩទាហរណ៍ដូចជា យន្តហោះទម្លាក់គ្រាប់បែក B-2 ដ៏ល្បីល្បាញ ប៉ុន្តែគ្រាន់តែស្លាបវាបានលាយបញ្ចូលគ្នា និងមានបរិមាណច្រើនជាងនៅផ្នែកកណ្តាល។ ហេតុដូច្នេះហើយទើបទាំងក្រុមហ៊ុន Boeing និង Airbus កំពុងតែគិតគូរជាមួយនឹងគំនិតថ្មីមួយនេះ។

 តាមពិតទៅគំនិតនៃការច្នៃរូបរាងថ្មីរបស់យន្តហោះ Boeing វាត្រូវ ផ្តួចផ្តើមឡើងដោយ JetZero ដែលស្ថាបត្យករ មានមូលដ្ឋាននៅរដ្ឋកាលីហ្វ័រញ៉ា ហើយ JetZero បានដាក់គោលដៅប្រកបដោយមហិច្ឆិតាទៀតថា នឹងដាក់ឱ្យដំណើរការនូវយន្តហោះស្លាបចម្រុះមួយនេះឱ្យបានមុនឆ្នាំ 2030 ។

មានមនុស្សជាច្រើនបានយល់ថា គំនិតនៃស្លាបចម្រុះវាហាក់ដូចជាមិនដូចជាកាច្នៃប្រឌិតដែលថ្មីនោះទេ ហើយការប៉ុនប៉ងដំបូងបំផុតក្នុងការសាងសង់យន្តហោះ ជាមួយនឹងការរចនានេះមានកាលបរិច្ឆេទត្រឡប់ទៅចុងទសវត្សរ៍ឆ្នាំ 1920 នៅប្រទេសអាល្លឺម៉ង់ទៅវិញទេ។ ថ្វីត្បិតតែវាជាយន្តហោះប្រភេទកូនកាត់ តែស្លាបរបស់វាគឺនៅតែបែបប្រពៃណីដដែល ប៉ុន្តែចំពោះអត្ថប្រយោជន៍នៃស្លាបប្រភេទនេះវិញ វាជួយឲ្យយន្តហោះទាំងមូលបង្កើតការលើកបានលឿនជាងមុន ដោយជាការកាត់បន្ថយការអូស។

ខាង NASA បាននិយាយ ថា រូបរាងនេះ “ជួយបង្កើនការសន្សំសំចៃប្រេង និងបង្កើតកន្លែងផ្ទុកទំនិញធំជាងផ្នែកកណ្តាលនៃយន្តហោះដែលសម្រាប់អ្នកធ្វើដំណើរ” ។ 

ទីភ្នាក់ងារមួយនេះបាននិយាយទៀតថា “យន្តហោះប្រភេទនេះនឹងមានស្លាបធំជាងយន្តហោះ Boeing 747 បន្តិច ហើយវាក៏មានទម្ងន់ស្រាលដែរ។ បើយើងនិយាយពីការបង្កើតសំលេងរំខាន និងការបញ្ចេញឧស្ម័នវិញគឺតិចតួចណាស់ ជាពិសេសជាងនេះទៅទៀត វាបានកាត់បន្ថយប្រហែល៥០% នៃការប្រើប្រាស់ប្រេងឥន្ទនៈ ថែមទៀតផង។

យ៉ាងណាមិញចំពោះរូបរាងថ្មីស្រឡាងបែបនេះ វានឹងធ្វើឱ្យផ្នែកខាងក្នុងនៃយន្តហោះមើលទៅ និងមានអារម្មណ៍ខុសប្លែកពីយន្តហោះដែលមានទំហំធំទូលាយនាពេលបច្ចុប្បន្ននេះ។ O’Leary ដែលជានាយកប្រតិបតិ្តបាននិយាយថា “វាគ្រាន់តែមានតួយន្តហោះធំជាងគេតែប៉ុណ្ណោះ។ 

លោកបាននិយាយទៀតថា ការសាងសង់យន្តហោះថ្មីទាំងស្រុងនេះ វាគឺជាកិច្ចការដ៏ធំបំផុតសម្រាប់យើង  ហើយវាក៏ជាគោលដៅ និងមហិច្ឆតា របស់ JetZero ដែលបានចំណាយពេលអស់ជាច្រើនឆ្នាំ។

ដើម្បីឱ្យសុបិន្តរបស់ JetZero ក្លាយជាការពិត” លោកបាននិយាយទៀតថា យើងនឹងត្រួតពិនិត្យឲ្យបានហ្មត់ចត់បំផុតក្នុងកំឡុងពេលបើកសាកល្បង ការធ្វើដូច្នេះវានឹងអាចដំណើរការជាផ្លូវការមុនឆ្នាំ ២០៣០ ដូចតាមការគ្រោងទុកជាមិនខាន។