យោងតាមការចុះផ្សាយពីសារព័ត៌មានរ៉យទ័រនៅថ្ងៃទី ១០ ខែសីហា បានឲ្យដឹងថា បើទោះបីជាអ៊ីរ៉ង់ និងអូម៉ង់ជិតឈានដល់កិច្ចព្រមព្រៀងកំណត់ផ្លូវដឹកជញ្ជូនថ្មីក៏ដោយ តែអ៊ីរ៉ង់បានបញ្ជាក់បន្ថែមថា  ច្រកសមុទ្រនេះនឹងមិនត្រូវបើកឡើងវិញជាទូទៅឡើយ ដរាបណាសហរដ្ឋអាមេរិកមិនទាន់បំពេញតាមលក្ខខណ្ឌដែលខ្លួនចង់បាន។

បច្ចុប្បន្នអ៊ីរ៉ង់កំពុងប្រើប្រាស់ការបិទខ្ទប់ច្រកសមុទ្រ Hormuz ហើយវាក៌ជាកលល្បិច និងជាឧបករណ៍មួយដាក់សម្ពាធផ្នែកនយោបាយ និងសេដ្ឋកិច្ចដើម្បីសម្រេចបានគោលដៅធំៗ៖

• ទាមទារសំណង និងលុបបំបាត់ទណ្ឌកម្ម៖ ទីក្រុងតេអេរ៉ង់ទាមទារឲ្យសហរដ្ឋអាមេរិកបង់ប្រាក់សំណងចំពោះការខូចខាតពីការវាយប្រហារតាមអាកាស ព្រមទាំងលុបចោលទណ្ឌកម្មសេដ្ឋកិច្ច និងរំដោះទ្រព្យសម្បត្តិអ៊ីរ៉ង់ដែលត្រូវ បានបង្កក។
• បញ្ឈប់ការគំរាមកំហែងផ្នែកយោធា៖ ស្ថាប័នសន្តិសុខជាតិអ៊ីរ៉ង់ទាមទារឲ្យអាមេរិកបញ្ចប់ការបិទផ្លូវកងទ័ពជើងទឹកនៅឈូងសមុទ្រ និងបញ្ឈប់ការវាយប្រហារលើអ៊ីរ៉ង់ រួមទាំងសម្ព័ន្ធមិត្តរបស់ខ្លួននៅលីបង់ ប៉ាឡេស្ទីន យេម៉ែន និងអ៊ីរ៉ាក់ជាដើម។
• ក្តោបក្តាប់ការគ្រប់គ្រងផ្លូវទឹក៖ អ៊ីរ៉ង់ស្វែងរកការគ្រប់គ្រងលើចរាចរណ៍នាវាដែលឆ្លងកាត់ច្រកសមុទ្រនេះ ដោយបានវាយប្រហារលើនាវាទាំងឡាយណាដែលឆ្លងកាត់ដោយគ្មានការអនុញ្ញាត។

យ៉ាងណាមិញ ការបិទច្រកសមុទ្រ Hormuz ត្រូវបានក្រុមអ្នកវិភាគមើលឃើញថា វាជាផ្នែកមួយដែលនាំឲ្យមានផលប៉ះពាល់ដល់សេដ្ឋកិច្ចយ៉ាងធ្ងន់ធ្ងរ៖

• វិបត្តិថាមពល និងការឡើងថ្លៃទំនិញ (អតិផរណា)៖ ច្រកសមុទ្រ Hormuz ជាផ្លូវដឹកជញ្ជូនប្រេង និងឧស្ម័នដ៏សំខាន់បំផុតមួយក្នុងលោក។ ការរាំងស្ទះនេះបណ្តាលឲ្យតម្លៃប្រេងឥន្ធនៈសកលហក់ឡើងខ្ពស់ ជំរុញឲ្យកើតមានអតិផរណា និងដំឡើងថ្លៃដើមនៃការរស់នៅរបស់ប្រជាជននៅគ្រប់ទ្វីប។
• ការរំខានដល់ខ្សែច្រវាក់ផ្គត់ផ្គង់សកល៖ ការវាយប្រហារបន្ថែមពីសំណាក់ក្រុមហ៊ូធី (Houthi) នៅយេម៉ែនទៅលើនាវាពាណិជ្ជកម្មក្នុងសមុទ្រក្រហម និងឈូងសមុទ្រ Aden បានធ្វើឲ្យផ្លូវពាណិជ្ជកម្មជុំវិញឧបទ្វីបអារ៉ាប់ត្រូវកកស្ទះ ដែលនាំឲ្យទំនិញប្រើប្រាស់ជាច្រើនត្រូវពន្យារពេល និងឡើងថ្លៃដឹកជញ្ជូន។
• ហានិភ័យនៃសង្គ្រាមរីករាលដាល៖ អស្ថិរភាពនេះបានបង្ខំឲ្យប្រទេសក្នុងតំបន់ដូចជា អារ៉ាប៊ីសាអូឌីត ចុះកតិកាសញ្ញាការពារជាតិជាមួយទួរគី និងប៉ាគីស្ថាន។ ការផ្លោងប្រហារលើហេដ្ឋារចនាសម្ព័ន្ធថាមពល (ដូចជារោងចក្រចម្រាញ់ប្រេង Aramco) និងតំបន់ស៊ីវិលក្នុងប្រទេសយេម៉ែន បង្កការគំរាមកំហែងផ្ទាល់ដល់ជីវិតប្រជាជនក្នុងតំបន់ និងបង្កើនហានិភ័យនៃអសន្តិសុខសកល។

The post អ៊ីរ៉ង់ត្រៀមបើកច្រកសមុទ្រ Hormuz ឡើងវិញ appeared first on Cambodia Peaceful News.

តាមរយៈទីក្រុងវ៉ាស៊ីនតោន៖ ក្រសួងការបរទេសសហរដ្ឋអាមេរិកបានប្រកាសកាលពីថ្ងៃ 7 ខែសីហា នេះថា លោក ដូណាល់ ត្រាំ គ្រោងនឹងផ្តល់កញ្ចប់ជំនួយសន្តិសុខចំនួន 1 ពាន់លានដុល្លារ ដល់ប្រធានាធិបតីថ្មីរបស់កូឡុំប៊ីគឺលោក Abelardo De La Espriella ដែលទើបតែស្បថចូលកាន់តំណែងជាផ្លូវការកាលពីពេលថ្មីៗនេះ។

ក្រសួងការបរទេសអាមេរិកបានបញ្ជាក់ទៀតថា ជំនួយខាងលើនេះធ្វើឡើងក្នុងគោលបំណងគាំទ្រដល់រដ្ឋាភិបាលថ្មីរបស់កូឡុំប៊ី ក្នុងការសម្រេចបាននូវគោលដៅរួមគ្នារវាងប្រទេសទាំងពីរឲ្យកាន់តែយូរអង្វែង។ ជាមួយគ្នានេះដែរ សហរដ្ឋអាមេរិកក៏ចង់បង្ហាញពីទឹកចិត្តក្នុងការស្វាគមន៍ប្រទេសកូឡុំប៊ី ដែលបានចូលទៅក្នុងសម្ព័ន្ធភាពយោធា «Shield of the Americas» ដែលបង្កើតឡើងដោយលោក ដូណាល់ ត្រាំ ក្នុងគោលបំណងប្រយុទ្ធប្រឆាំងនឹងការជួញដូរគ្រឿងញៀន និងឧក្រិដ្ឋកម្មឆ្លងដែនក្នុងតំបន់អាមេរិកឡាទីន។

គួររំលឹកថា ការជ្រៀតជ្រែក និងការគាំទ្រផ្នែកហិរញ្ញវត្ថុ ពីសរដ្ឋអាមេរិក វានឹងធ្វើឲ្យកូឡុំប៊ីផ្លាស់ប្តូរទិសដៅនយោបាយ ពោលគឺផ្ទុយស្រឡះពីអតីតប្រធានាធិបតី លោក Gustavo Petro។

យ៉ាងណាមិញ ការផ្លាស់ប្តូរមេដឹកនាំរបស់កូឡុំប៊ីលើកនេះ យើងក៏អាចមើលឃើញកាន់តែច្បាស់ថា ជំនួយរបស់សហរដ្ឋអាមេរិក វាមិនមែនត្រឹមតែជាការគាំទ្រប៉ុណ្ណោះទេ តែវាក៏ជាការចាប់ផ្តើមឡើងវិញនៃទំនាក់ទំនងទ្វេភាគី ឲ្យកាន់តែរឹងមាំផងដែរ។

The post អាមេរិកសន្យាផ្តល់ជំនួយសន្តិសុខ មួយពាន់លានដុល្លារ ដល់មេដឹកនាំថ្មីរបស់ប្រទេសកូឡុំប៊ី appeared first on Cambodia Peaceful News.

សានតា ហ្វេ (Santa Fe)៖ តុលាការរដ្ឋ New Mexico សហរដ្ឋអាមេរិក កាលពីថ្ងៃព្រហស្បតិ៍ បានបង្គាប់ឱ្យក្រុមហ៊ុន Meta បង់ប្រាក់ចំនួន ៥៦៧ លានដុល្លារអាមេរិក ចូលទៅក្នុងមូលនិធិសុខភាពផ្លូវចិត្តវ័យជំទង់ និងត្រូវផ្លាស់ប្តូររបៀបដំណើរការបណ្តាញសង្គមរបស់ខ្លួនសម្រាប់អ្នកប្រើប្រាស់វ័យក្មេង បន្ទាប់ពីតុលាការរកឃើញថា ក្រុមហ៊ុនមួយនេះមានកំហុសក្នុងការធ្វើឱ្យប៉ះពាល់ដល់សុខុមាលភាពរបស់កុមារ។

ចៅក្រម Bryan Biedscheid នៅទីក្រុង Santa Fe បានសម្រេចថា ក្រុមហ៊ុន Meta បានបង្កើតផលប៉ះពាល់ជាសាធារណៈនៅក្នុងរដ្ឋ New Mexico ដោយបានយល់ស្របតាមការចោទប្រកាន់របស់អគ្គរដ្ឋអាជ្ញារដ្ឋ លោក Raúl Torrez។ លោក Torrez បានចោទប្រកាន់ក្រុមហ៊ុនបណ្តាញសង្គមយក្សមួយនេះថា បានរចនាផលិតផលដែលធ្វើឱ្យអ្នកប្រើប្រាស់វ័យក្មេង “ញៀន” និងបានបរាជ័យក្នុងការការពារកុមារពីការកេងប្រវ័ញ្ចផ្លូវភេទនៅលើផ្លែតហ្វម (Platform) របស់ខ្លួន។

ក្រោមសេចក្តីសម្រេចដែលមានរយៈពេល ៥ ឆ្នាំ ចៅក្រមបានបង្គាប់ឱ្យ Meta អនុវត្តវិធានការសុវត្ថិភាពសម្រាប់យុវជនជាច្រើន រួមមាន៖

• កំណត់កម្រិតនៃការប្រើប្រាស់ Facebook និង Instagram របស់វ័យជំទង់ប្រចាំខែ
• រឹតបន្តឹងការជូនដំណឹង (Notifications)
• គ្រប់គ្រងយ៉ាងម៉ឺងម៉ាត់លើការទំនាក់ទំនងរវាងមនុស្សពេញវ័យ និងអនីតិជន
• ការពារលើប្រព័ន្ធ AI Chatbots ដើម្បីបង្ការកុំឱ្យកុមារសន្ទនាក្នុងរូបភាពស្នេហា ឬផ្លូវភេទជាមួយ AI
• បង្កើនការពិនិត្យមើលរបាយការណ៍ស្តីពីការរំលោភបំពានផ្លូវភេទលើកុមារ

សេចក្តីសម្រេចនេះកើតឡើង ៥ ខែ បន្ទាប់ពីគណៈវិនិច្ឆ័យក្នុងរដ្ឋ New Mexico បានបង្គាប់ឱ្យ Meta បង់ប្រាក់ចំនួន ៣៧៥ លានដុល្លាររួចមកហើយ ក្នុងករណីរំលោភច្បាប់ការពារអ្នកប្រើប្រាស់។ បច្ចុប្បន្ន រដ្ឋជាង ៤០ និងមណ្ឌលសិក្សាជាង ១.៣០០ នៅក្នុងសហរដ្ឋអាមេរិក ក៏បានដាក់ពាក្យបណ្តឹងប្រឆាំងនឹងក្រុមហ៊ុនបណ្តាញសង្គម ដើម្បីទាមទារសំណង និងទាមទារឱ្យមានការផ្លាស់ប្តូរផលិតផល ព្រមទាំងប្រតិបត្តិការដូចគ្នាផងដែរ។

លោក Raúl Torrez អគ្គរដ្ឋអាជ្ញារដ្ឋ New Mexico បានថ្លែងថា Meta បានជ្រើសរើសយកប្រាក់ចំណេញជាជាងសុវត្ថិភាពកុមារ ហើយសេចក្តីសម្រេចនេះគឺជា “ផែនទីចង្អុលផ្លូវ” សម្រាប់រដ្ឋ និងប្រទេសផ្សេងទៀតដែលកំពុងប្រឈមមុខនឹងវិបត្តិដូចគ្នា។

ដោយឡែក ក្រុមហ៊ុន Meta បានបញ្ជាក់ថានឹងប្តឹងតវ៉ាទាស់ទៅនឹងសេចក្តីសម្រេចនេះ ដោយអះអាងថាខ្លួនតែងតែខិតខំលុបបំបាត់មាតិកាគ្រោះថ្នាក់ និងការពារសុវត្ថិភាពវ័យជំទង់នៅលើអ៊ីនធឺណិតជានិច្ច។

The post តុលាការអាមេរិកបង្គាប់ឱ្យក្រុមហ៊ុន Meta បង់ប្រាក់ ៥៦៧ លានដុល្លារ ជុំវិញការធ្វើឱ្យប៉ះពាល់ដល់សុខភាពផ្លូវចិត្តវ័យជំទង់ appeared first on Cambodia Peaceful News.

ទីក្រុងបាងកក៖ អាជ្ញាធរមូលដ្ឋានប្រទេសថៃបានឱ្យដឹងថា មនុស្សយ៉ាងហោចណាស់ ៧ នាក់បានស្លាប់ និងជាង ១២ នាក់ផ្សេងទៀតបានរងរបួស ក្នុងករណីបាញ់ប្រហារដ៏រន្ធត់មួយ កាលពីព្រឹកថ្ងៃសុក្រនេះ បន្ទាប់ពីសិស្សសាលាម្នាក់បានបាញ់សម្លាប់ជីដូនជីតារបស់ខ្លួននៅឯផ្ទះ រួចបានបន្តទៅបើកការបាញ់ប្រហារនៅក្នុងវិទ្យាល័យមួយ ក្បែររាជធានីបាងកក។

ហេតុការណ៍នេះបានកើតឡើងនៅវិទ្យាល័យ Debsirin Nonthaburi ដែលស្ថិតនៅភាគពាយព្យនៃទីក្រុងបាងកក ហើយបានបញ្ចប់ទៅវិញនៅពេលដែលខ្មាន់កាំភ្លើងបានបាញ់សម្លាប់ខ្លួនឯង។ លោក Polapee Suwunchwee អនុរដ្ឋមន្ត្រីក្រសួងមហាផ្ទៃថៃ បានបញ្ជាក់តាមកញ្ចក់ទូរទស្សន៍ថា អ្នកស្លាប់នៅក្នុងបរិវេណសាលាមានចំនួន ៦ នាក់ រួមមានគ្រូបង្រៀន ៥ នាក់ និងខ្លួនខ្មាន់កាំភ្លើងផ្ទាល់ ខណៈដែលជីដូនជីតារបស់គេត្រូវបានបាញ់សម្លាប់នៅឯផ្ទះមុនពេលកើតហេតុ។

វីដេអូដែលត្រូវបានបង្ហោះលើបណ្តាញសង្គមបានបង្ហាញឱ្យឃើញសិស្សសាលាជាច្រើននាក់កំពុងក្រាបពួនក្រោមក្តារខៀន និងតុក្នុងថ្នាក់រៀន ខណៈពេលដែលមានសំឡេងកាំភ្លើងផ្ទុះឡើងយ៉ាងហោចណាស់ ៨ គ្រាប់ក្នុងរយៈពេលត្រឹមតែមួយនាទី។ របាយការណ៍ខ្លះបានឱ្យដឹងថា ខ្មាន់កាំភ្លើងរូបនេះបានបាញ់ប្រហារអស់ប្រមាណ ២៦ គ្រាប់ ដោយប្រើប្រាស់កាំភ្លើងខ្លីស្របច្បាប់របស់ជីតារបស់គេ ដែលជាអតីតគ្រូបង្រៀនរដ្ឋ។

ប្រទេសថៃគឺជាប្រទេសមួយដែលមានអត្រាប្រជាជនកាន់កាប់អាវុធស៊ីវិលខ្ពស់ជាងគេនៅក្នុងតំបន់អាស៊ីអាគ្នេយ៍។ ករណីបាញ់ប្រហារដ៏រន្ធត់ចុងក្រោយនេះ បានធ្វើឱ្យមានការទាមទារកាន់តែខ្លាំងឡើងពីសាធារណជន ឱ្យមានការរឹតបន្តឹងច្បាប់គ្រប់គ្រងអាវុធកាំភ្លើងនៅក្នុងប្រទេស បន្ទាប់ពីធ្លាប់មានករណីបាញ់ប្រហារជាបន្តបន្ទាប់នាពេលកន្លងមក ដូចជាករណីអតីតប៉ូលីសបាញ់ប្រហារនៅមណ្ឌលកុមារតូចក្នុងឆ្នាំ ២០២២, ករណីក្មេងវ័យ ១៤ ឆ្នាំបាញ់ប្រហារនៅផ្សារទំនើបក្នុងឆ្នាំ ២០២៣ និងករណីបាញ់ប្រហារនៅទីផ្សារក្នុងទីក្រុងបាងកកកាលពីឆ្នាំមុន។

The post ករណីបាញ់ប្រហារយ៉ាងរន្ធត់នៅសាលារៀនក្នុងប្រទេសថៃ៖ មនុស្សយ៉ាងហោចណាស់ ៧ នាក់បានបាត់បង់ជីវិត appeared first on Cambodia Peaceful News.

មនុស្សរាប់សែននាក់នៅភាគនិរតីនៃប្រទេសជប៉ុនត្រូវបានអាជ្ញាធរជំរុញ និងបញ្ជាឱ្យជម្លៀសខ្លួនជាបន្ទាន់ ហើយជើងហោះហើរជាង ៥០០ ត្រូវបានលុបចោលកាលពីថ្ងៃសុក្រ ខណៈដែលព្យុះទីហ្វុង Dolphin (ដូហ្វ៊ីន) កំពុងរំកិលខ្លួនយ៉ាងយឺតៗចូលមកជិតតំបន់នេះ ដោយនាំមកជាមួយនូវខ្យល់បក់បោកយ៉ាងខ្លាំង មេឃភ្លៀងធ្លាក់រហូតដល់កម្រិតធ្ងន់ធ្ងរ និងរលកសមុទ្រធំៗ។

នាយកដ្ឋានឧតុនិយមជប៉ុន (JMA) បានឱ្យដឹងថា ព្យុះទីហ្វុងកម្រិតទី ១ នេះ មានល្បឿនខ្យល់បក់អតិបរមា ១៤៤ គីឡូម៉ែត្រក្នុងមួយម៉ោង និងមានខ្យល់កន្ត្រាក់ខ្លាំងរហូតដល់ ១៩៨ គីឡូម៉ែត្រក្នុងមួយម៉ោង ដោយបាន និងកំពុងខិតជិតប្រជុំកោះចន្លោះតំបន់ Kyushu និងខេត្ត Okinawa។ អាជ្ញាធរបានចេញបញ្ជាឱ្យជម្លៀសប្រជាជនជិត ២៦០,០០០ នាក់នៅក្នុងខេត្ត Kagoshima និងខេត្ត Okinawa។ ជាមួយគ្នានេះដែរ ក្រុមហ៊ុនផលិតរថយន្ត Toyota បានសម្រេចផ្អាកសង្វាក់ផលិតកម្មនៅរោងចក្រចំនួន ៩ ក្នុងប្រទេសជប៉ុន ដោយសារការព្រួយបារម្ភពីការរំខានដល់ការដឹកជញ្ជូនរថយន្តតាមផ្លូវសមុទ្រ។

អាជ្ញាធរបានព្រមានថា ព្យុះទីហ្វុង Dolphin ត្រូវបានរំពឹងថានឹងរក្សាកម្លាំងដដែលនៅពេលវារំកិលចូលជិតខេត្ត Okinawa ដែលបង្កឱ្យមានហានិភ័យនៃខ្យល់បក់ខ្លាំង អាចបំផ្លាញ ឬរលំផ្ទះសម្បែង និងសំណង់ផ្សេងៗ។ នាយកដ្ឋានឧតុនិយមក៏បានបន្ថែមថា បាតុភូត “ខ្សែបន្ទាត់ភ្លៀង” (Linear rain band) ឬតំបន់ចង្អៀតនៃភ្លៀងធ្លាក់ខ្លាំង និងផ្គររន្ទះ អាចនឹងកើតមានឡើង ដែលអាចបង្កឱ្យមានគ្រោះទឹកជំនន់ភ្លាមៗផងដែរ។

លើសពីនេះ ព្យុះដ៏ធំមួយនេះបានគ្របដណ្តប់ភាគច្រើននៃកោះ Kyushu ដែលជាកោះធំនៅភាគខាងត្បូង រួមទាំងខេត្ត Kumamoto ផងដែរ។ តំបន់ Kumamoto នេះទើបតែរងការវាយប្រហារដោយគ្រោះរញ្ជួយដីកម្រិត ៧.១ រ៉ិចទ័រ កាលពីសប្តាហ៍មុន ដោយបច្ចុប្បន្នមានប្រជាពលរដ្ឋប្រមាណ ៦,៧០០ នាក់កំពុងស្នាក់នៅក្នុងមជ្ឈមណ្ឌលជម្លៀសខ្លួន បន្ទាប់ពីផ្ទះសម្បែងជាច្រើនបានបាក់រលំ។ ក្រៅពីគំរាមកំហែងនៃព្យុះ ភ្នាក់ងារឧតុនិយមក៏បានព្រមានអំពីហានិភ័យនៃជំងឺស៊កកំដៅ (Heatstroke) ដោយសារសីតុណ្ហភាពអាចកើនឡើងរហូតដល់ ៣៦ អង្សាសេនៅតំបន់មួយចំនួន។

The post ជើងហោះហើរប្រហែល ៥០០ ជើងត្រូវបានផ្អាក និងលុបចោល ខណៈព្យុះទីហ្វុងដូហ្វីនខិតជិតមកដល់ appeared first on Cambodia Peaceful News.

ភ្លើងឆេះព្រៃបានបង្ខំមនុស្សរាប់ពាន់នាក់ត្រូវជម្លៀសចេញបណ្តោះអាសន្ន ពោលគឺបន្ទាប់ពីមានភ្លើងឆេះព្រៃនៅប្រទេសកាណាដាអស់រយៈពេលជិតពីរសប្តាហ៍កន្លងមក។

យោងតាមការចុះផ្សាយពី Theguardian​ បានចុះផ្សាយនៅថ្ងៃទី 31 ខែឧសភានេះថា ផ្សែងដែលហុយចេញពីភ្លើងឆេះព្រៃដ៏ធំសម្បើម បានផ្ទុះឡើងសូម្បីតែខេត្តដែលមានតែវាលស្មៅ។​

ភ្លើងឆេះព្រៃលើផ្ទៃដីប្រហែល 200,000 ហិកតាហើយនៅឆ្នាំនេះ វាគឺមានទំហំរហូតដល់ទៅជិតបីដងនៃចំនួនមធ្យមពេញមួយឆ្នាំ ដែលយើងអាចនិយាយបានថា ភ្លើងឆេះព្រៃលលើកនេះបានចូលទៅបំបែកកំណត់ត្រាប្រវត្តិសាស្ត្ររបស់កាណាដាថែមទៀតផង។

យ៉ាងណាមិញ ដើម្បីជាការការពារដល់សុខភាពរបស់មនុស្សនឹងសត្វ ក្រុមអ្នកឆ្លើយតបគ្រោះមហន្តរាយរបស់កាណាដាបានជូនដំណឹងអំពីគុណភាពខ្យល់ថា ផ្សែងដែលចូលទៅលាយឡំជាមួយនឹងខ្យល់វានឹងធ្វើឲ្យគុណភាពខ្យល់កាន់តែអាក្រក់ទៅៗ ពីមួយថ្ងៃទៅមួយថ្ងៃ​ ហើយផលប៉ះពាល់នេះទៀតសោតវាមិនមែនមានតែប្រជាជនកាណានោះទេ ព្រោះក្នុងរយៈពេលប៉ុន្មានថ្ងៃខាងមុខនេះ តំបន់មួយចំនួននៃភាគខាងកើត និងខាងជើងសហរដ្ឋអាមេរិកនឹងទទួលរងនូវផលប៉ះពាល់នេះដូចគ្នា។

The post ភ្លើងឆេះព្រៃដ៏ធំបំផុត នៅប្រទេសកាណាដា appeared first on Cambodia Peaceful News.

ដំណើរទស្សនកិច្ចរបស់ប្រធានាធិបតីបារាំងលោក Emmanuel Macron និងភរិយា ទៅកាន់វៀតណាម កាលពីថ្ងៃទី 26 ខែមិថុនា វាគឺជាលើកដំបូងហើយ ប្រសិនបើយើងគិតចាប់តាំងពីលោកឡើងកាន់តំណែងក្នុងឆ្នាំ 2017 ហើយត្រូវបានជាប់ឆ្នោតឡើងវិញនៅឆ្នាំ 2022 កន្លងមក។

នៅក្នុងកិច្ចសហប្រតិបត្តិការសេដ្ឋកិច្ច និងវិស័យពាណិជ្ជកម្ម វៀតណាមបានក្លាយទៅជាអ្នកផ្គត់ផ្គង់ដ៏សំខាន់ទៅហើយនៅក្នុងអ៊ឺរ៉ុប។ យ៉ាងណាមិញ ប្រសិនបើយើងក្រឡែកទៅមើលទំហំពាណិជ្ជកម្មដែលវៀតណាមទទួលបានពីប្រទេសបារាំងវិញនោះ ខាងកាសែត VNS បានឲ្យដឹងថា ទំហំពាណិជ្ជកម្មទ្វេភាគីរបស់ប្រទេសទាំងពីរបានឈានដល់ 5.33 ពាន់លានដុល្លារកាលពីក្នុងឆ្នាំ 2022 ហើយបន្ទាប់មកក៏ឡើង 5.42 ពាន់លានក្នុងឆ្នាំ 2024 ហើយចុងក្រោយនេះ ប្រមាណ 1.79​ ពាន់លានដុល្លារដោយគិតត្រឹមរយៈពេល 4 ខែដំបូងនៃឆ្នាំ 2025។

យ៉ាងណាមិញ ចំពោះការមកដល់របស់លោក Macron  នៅក្នុងប្រទេសវៀតណាមលើកនេះផងដែរ វាត្រូវបានឯកអគ្គរដ្ឋទូតវៀតណាមប្រចាំនៅបារាំង លោក Đinh Toàn Thắng បាននិយាយថា បារាំងមានគោលបំណងចង់ផ្លាស់ប្តូរគំនិត និងចំណេះដឹងលើប្រព័ន្ធឌីជីថលជាមួយវៀតណាម ហើយវាក៏ជាអាទិភាពយុទ្ធសាស្ត្រមួយសម្រាប់វៀតណាមផងដែរ ដើម្បីអាចជួយដល់សមត្ថភាពស្រាវជ្រាវវិទ្យាសាស្ត្រ ដែលជាគ្រឹៈមួយជួយឲ្យពួកគេអាចក្លាយជាប្រទេសមួយដែលនាំមុខក្នុងការច្នៃប្រឌិត។

The post ពិធីស្វាគមន៍ប្រធានាធិបតីបារាំង Macron នៅទីក្រុងហាណូយ appeared first on Cambodia Peaceful News.

ប្រព័ន្ធផ្សព្វផ្សាយរដ្ឋបានរាយការណ៍ថា ឆ្មាំឆ្នេរសមុទ្រចិនបានរឹបអូសយកច្រាំងខ្សាច់តូចមួយនៅសមុទ្រចិនខាងត្បូង ដែលជាច្រកមួយក្នុងការបង្កើនជម្លោះជាមួយនឹងប្រទេសហ្វីលីពីន។

ទូរទស្សន៍រដ្ឋ CCTV បានចេញផ្សាយរូបភាពមន្ត្រីបួននាក់ដែលពាក់អាវខ្មៅ និងកាន់ទង់ជាតិចិនឈរនៅលើថ្មប៉ប្រះទឹក Sandy Cay ក្នុងប្រជុំកោះ Spratly របស់ហ្វីលីពីន ។

គួរបញ្ជាក់ថាថ្មប៉ប្រះទឹក Sandy Cay វាមានទីតាំងស្ថិតនៅជិតកោះ Thitu ដែលជាបន្ទាយយោធាហ្វីលីពីន ហើយជារឿងៗ កោះមួយនេះវាត្រូវបានគេយកទៅប្រើប្រាស់ដើម្បីតាមដានសកម្មភាពរបស់ចិន។
តែបើទោះបីជារូបភាពជាច្រើនបានចេញផ្សាយដោយទូរទស្សន៍រដ្ឋរបស់ចិនក៏ពិតមែន ប៉ុន្តែបើយោងតាមការរាយការណ៍ពី BBC បានឲ្យដឹងថា ក្រុមការងាររបស់ពួកគេមិនទាន់ទទួលបានរបាយការណ៍ណាមួយដែលបង្ហាញថា ប្រទេសចិនកំពុងកាន់កាប់កោះ Sandy Cay នោះឡើយ។

គួរបញ្ជាក់សារជាថ្មីថា ខាងសេតវិមានបាននិយាយថា ប្រសិនបើរបាយការណ៍របស់ចិនដែលបង្ហោះថា ប្រទេសខ្លួនបានរឹបអូសយកច្រាំងថ្មប៉ប្រះទឹកហ្វីលីពីនជារឿងពិត នោះវានឹងក្លាយជារឿងព្រួយបារម្ភយ៉ាងខ្លាំងសម្រាប់សមុទ្រចិនខាងត្បូង (BBC 27 Apr)។

The post ទូរទស្សន៍រដ្ឋ CCTV៖ កូនកោះ Sandy Cay បានក្លាយជារបស់ប្រទេសចិន appeared first on Cambodia Peaceful News.

ប្រធានាធិបតីអាមេរិក លោក Donald Trump បានចុះហត្ថលេខាលើបទបញ្ជាប្រតិបត្តិដ៏ធំមួយ ដើម្បីចាប់ផ្តើម ការការជីកយករ៉ែនៅសមុទ្រជ្រៅ ដើម្បីបំបែកកំណត់ត្រារបស់ប្រទេសចិន។

រដ្ឋបាលរបស់លោក Trump កំពុងស្វែងរកការតាមដានយ៉ាងរហ័សនូវការស្វែងរកសារធាតុរ៉ែសំខាន់ៗ ដែលមានដូចជា នីកែល ទង់ដែង និងធាតុកម្រពីបាតសមុទ្រដែលមាននៅក្នុងសហរដ្ឋអាមេរិក និងដែនទឹកអន្តរជាតិ។

បើយោងតាមការរៀបរាប់ពីលោក Trump បាននិយាយនៅក្នុងបទបញ្ជាប្រតិបត្តិកាលពីថ្ងៃព្រហស្បតិ៍ថា លោកបាននិយាយថា សហរដ្ឋអាមេរិកត្រូវតែនាំមុខខាងផ្នែកសន្តិសុខ  និងការថែររក្សាភាពជាអ្នកដឹកនាំក្នុងវិស័យវិទ្យាសាស្ត្រ និងបច្ចេកវិទ្យានៅសមុទ្រជ្រៅ ជាពិសេសគឺធនធានរ៉ែនៅបាតសមុទ្រ” ។

គួរបញ្ជាក់ថា សម្រាប់សកម្មភាពឯកតោភាគីរបស់សហរដ្ឋអាមេរិកដែលធ្វើឡើងនាពេលនេះ គឺពួកគេមានគោលបំណង ចង់ប្រឆាំងនឹងឥទ្ធិពលរបស់ចិនដែលកំពុងកើនឡើងខ្លាំង ជាពិសេសគឺទៅលើធនធានរ៉ែនៅបាតសមុទ្រដែលជ្រៅ។

ទីតាំងដែលមាននៅក្នុងលិខិតអនុញ្ញាតរបស់លោក Trump គឺមាននៅតាមបណ្តោយខ្ពង់រាបទ្វីបខាងក្រៅរបស់សហរដ្ឋអាមេរិក រហូដល់តំបន់ហួសពីដែនសមត្ថកិច្ចជាតិរបស់អាមេរិកផងដែរ (CNBC 25 Apr)។

The post សហរដ្ឋអាមេរិក បានចាប់ផ្តើមជីកយករ៉ែកនៅសមុទ្រជ្រៅ appeared first on Cambodia Peaceful News.

ឥណ្ឌានឹងពង្រឹងភាពជាដៃជាមួយប្រទេសអារ៉ាប៊ីសាអូឌីត  បន្ទាប់ពីដំណើរទស្សនកិច្ចរបស់នាយករដ្ឋមន្រ្តីឥណ្ឌា Narendra Modi ទៅកាន់ទីក្រុង Riyadh នៅសប្តាហ៍នេះ។

Bloomberg បានរាយការណ៍ថា កិច្ចព្រមព្រៀងលើវិស័យថាមពលរវាងប្រទេសឥណ្ឌា និង អារ៉ាប៊ីសាអូឌីត គឺវាមានជាប់ពាក់ពាន់ទៅនឹងការសាងសង់រោងចក្រចម្រាញ់ប្រេងថ្មីចំនួនពីរនៅក្នុងប្រទេសឥណ្ឌា  វារីអគ្គិសនី ថាមពលកកើតឡើងវិញ និងបជ្ឈមណ្ឌលព្យាករណ៍អាកាសធាតុជាដើម។

រាជទាយាទអារ៉ាប៊ីសាអូឌីត ព្រះអង្គម្ចាស់ Mohammed bin Salman និងលោកនាយករដ្ឋមន្ត្រីឥណ្ឌា Narendra Modi បានជួបប្រជុំគ្នានៅទីក្រុង Jeddah កាលពីថ្ងៃអង្គារ ដើម្បីពិភាក្សាអំពីគំនិតផ្តួចផ្តើមខាងលើនេះ។

បើយោងតាមសារព័ត៌មាន Reuters បានឱ្យដឹងបន្ថែមថា ក្រុមហ៊ុនប្រេងដ៏ធំដែលគ្រប់គ្រងដោយរដ្ឋអារ៉ាប៊ីសាអូឌីត Aramco បច្ចុប្បន្នកំពុងតែពិភាក្សាលើការវិនិយោគនៅក្នុងរោងចក្រចម្រាញ់ប្រេង Bharat Petroleum Corp (BPC) ដែលគ្រោងនឹងធ្វើឡើងនៅរដ្ឋ Andhra Pradesh ភាគខាងត្បូង និងរោងចក្រចម្រាញ់ប្រេង និងឧស្ម័នធម្មជាតិ (ONGC) នៅរដ្ឋ Gujarat ភាគខាងលិចនៃប្រទេសឥណ្ឌាផងដែរ។

គួរបញ្ជាក់ថា នៅក្នុងដំណើរទស្សនៈកិច្ចរបស់នាយករដ្ឋមន្ត្រីឥណ្ឌាលើកនេះ ព្រះអង្គម្ចាស់រាជទាយាទរបស់អារ៉ាប៊ីសាអូឌីតបានសន្យាថា ខ្លួននឹងផ្តល់ការវិនិយោគចំនួន 100 ពាន់លានដុល្លារដល់ប្រទេសឥណ្ឌា ដើម្បីជួយសម្រួលដល់កំណើនពាណិជ្ជកម្មរបស់ឥណ្ឌាថែមទៀតផង។

គួររំលឹកថា កិច្ចព្រមព្រៀងពាណិជ្ជកម្មខាងលើនេះ វាបានកើតឡើងបន្ទាប់ពីឥណ្ឌាបានទិញប្រេងយ៉ាងច្រើនសន្ធឹកសន្ធាប់ពីប្រទេសរុស្ស៊ី។ យ៉ាងណាមិញ ចំពោះគោលបំណងរបស់ព្រះអង្គម្ចាស់ គឺទ្រង់ចង់ឲ្យឥណ្ឌាក្លាយទៅជាប្រទេសដែលនាំចូលប្រេងពីអារ៉ាប៊ីសាអូឌីតបានច្រើនជាងគេនៅក្នុងពិភពលោក។

The post ព្រះអង្គម្ចាស់រាជទាយាទរបស់អារ៉ាប៊ីសាអូឌីតបានសន្យាថា ទ្រង់នឹងផ្តល់ការវិនិយោគចំនួន 100 ពាន់លានដុល្លារដល់ប្រទេសឥណ្ឌា appeared first on Cambodia Peaceful News.