ក្រុមអ្នកស្រាវជ្រាវនៅវិទ្យាស្ថានវិស្វកម្មសំណង់ស៊ីវិល និងបច្ចេកវិទ្យាកូរ៉េ (KICT) បាននិយាយកាលពីថ្ងៃព្រហស្បតិ៍ថា ដោយក្រុមអ្នកវិទ្យាសាស្ត្រកូរ៉េ Holly Chik បានបង្កើតប្រព័ន្ធព្យាករណ៍ថ្មីមួយ ដើម្បីជូនដំណឹងដល់ប្រជាពលរដ្ឋ អំពីទឹកជំនន់ដែលអាចកើតឡើងភ្លាមៗយ៉ាងហោចណាស់ត្រឹមមួយម៉ោងជាមុន នេះគឺជាការផ្តល់ពេលវេលាដ៏សំខាន់ដើម្បីជម្លៀសប្រជាជនចេញពីតំបន់ដែលមានហនិភ័យនោះ ។ ការិយាល័យគ្រប់គ្រងទឹកជំនន់បានចាប់ផ្តើមដំណើរការសាកល្បងប្រព័ន្ធក្នុងទីក្រុងសេអ៊ូល ដោយមានផែនការពង្រីកសេវាកម្មទូទាំងប្រទេសនៅឆ្នាំក្រោយ។
លោក Hwang Seok-hwan សាស្ត្រាចារ្យនៅនាយកដ្ឋានវារីអគ្គិសនីបាននិយាយថា៖ «នៅពេលដែលប្រព័ន្ធរកឃើញព្រឹត្តិការណ៍ទឹកជំនន់ដ៏មានសក្តានុពល វានិងត្រូវផ្សព្វផ្សាយការព្រមាន និងការជូនដំណឹងតាមរយៈបណ្តាញផ្សេងៗដូចជា៖ ការផ្សាយបន្ទាន់តាមកម្មវិធីទូរស័ព្ទ ស៊ីរ៉ែន ប្រព័ន្ធផ្សព្វផ្សាយសង្គម និងសារអត្ថបទ។ ការស្រាវជ្រាវវិទ្យាសាស្ត្រ និងវិស្វកម្មនៃសាកលវិទ្យាល័យវិទ្យាសាស្ត្រ និងបច្ចេកវិទ្យាកូរ៉េ វិទ្យាស្ថានវិស្វកម្មសំណង់ស៊ីវិល និងបច្ចេកវិទ្យាសំណង់ (UST-KICT) បាននិយាយប្រាប់កាសែត The Korea Times ។
លោកបាននិយាយថា “ការជូនដំណឹងទាំងនេះត្រូវបានកំណត់គោលដៅដល់អាជ្ញាធរ អ្នកសង្គ្រោះបន្ទាន់ និងសាធារណៈជន ដែលអនុញ្ញាតឱ្យពួកគេចាត់វិធានការសមស្រប” ដោយស្នើឱ្យប្រជាជនមានការប្រុងប្រយ័ត្នដើម្បីការពារទ្រព្យសម្បត្តិរបស់ពួកគេ រៀបចំឧបករណ៍សង្គ្រោះបន្ទាន់ និងបង្កើតផែនការជម្លៀស។
បើយោងតាមអង្គការឧតុនិយមពិភពលោក បានឱ្យដឹងថា ទឹកជំនន់ដែលកើតឡើងភ្លាមៗ គឺជាគ្រោះមហន្តរាយធម្មជាតិដ៏សាហាវបំផុតរបស់ពិភពលោក ដែលបណ្តាលឱ្យមានមនុស្សស្លាប់ច្រើនជាង 5,000 នាក់ ជារៀងរាល់ឆ្នាំ។ ពួកវាកើតឡើងនៅពេលដែលមានភ្លៀងធ្លាក់ខ្លាំង ដែលប្រមូលផ្តុំនៅតំបន់តូចៗ បណ្តាលឱ្យកម្រិតទឹកកើនឡើងភ្លាមៗ។
កម្លាំងទឹកដែលមានល្បឿនលឿន អាចបោសសម្អាតយានជំនិះ និងលង់ទឹក ឬបង្ករបួសស្នាមដល់មនុស្សផងដែរ។ នៅតំបន់ភ្នំ ទឹកជំនន់ភ្លាមៗអាចបង្កឱ្យមានការបាក់ដី លេបត្របាក់ និងបំផ្លាញផ្ទះសម្បែង និងដំណាំកសិកម្ម។ រដ្ឋាភិបាលនៃក្រុងសេអ៊ូល បានណែនាំដល់ប្រជាពលរដ្ឋ ក្នុងករណីមានទឹកជំនន់ភ្លាមៗ ត្រូវជម្លៀសខ្លួនទៅកាន់ទីទួលខ្ពស់ និងជៀសវាងការចូលទៅក្នុងទឹកហូរ ឬបើកបរក្នុងតំបន់ទឹកជំនន់។
កាលពីខែសីហាឆ្នាំមុន ជំនន់ទឹកភ្លៀងដែលបានបំបែកកំណត់ត្រាបានជន់លិចផ្ទះ ផ្លូវថ្នល់ និងស្ថានីយ៍រថភ្លើងក្រោមដីនៅទូទាំងប្រទេស ដោយបង្កើតឱ្យមានទឹកជំនន់ភ្លាមៗ ដែលបានសម្លាប់មនុស្សយ៉ាងហោចណាស់ប្រាំបួននាក់ និងខូចខាតផ្ទះប្រហែល 2,800 ខ្នង។
បើយោងតាមក្រុម KICT បានឱ្យដឹងថា នៅតំបន់ទំនាបដូចជាស្រុក Gangnam ភាគខាងត្បូងទីក្រុងសេអ៊ូល និងតំបន់ភ្នំ ទឹកបានហក់ឡើង និងហូរលឿនជាងតំបន់ផ្សេងទៀតដែលមានបរិមាណទឹកភ្លៀងដូចគ្នា។
ពួកគេបាននិយាយថា ទឹកជំនន់ភ្លាមៗនឹងកើតឡើងញឹកញាប់ជាងមុន ដោយសារការកើនឡើងនៃកំដៅផែនដី គឺវានាំឱ្យមានការហួតកាន់តែច្រើន ដោយហេតុនេះបង្កើតសំណើមកាន់តែច្រើននៅក្នុងបរិយាកាស ដែលបន្ទាប់មកបង្កជាព្យុះភ្លៀងខ្លាំង។ ទន្ទឹមនឹងនេះ ការប្រែប្រួលអាកាសធាតុបណ្តាលឱ្យមានការប្រែប្រួលនៃគំរូទឹកភ្លៀង ដែលបណ្តាលឱ្យមានភ្លៀងធ្លាក់ខ្លាំង និងញឹកញាប់នៅក្នុងតំបន់មួយចំនួន ដែលធ្វើឱ្យការព្យាករណ៍ត្រឹមត្រូវមានភាពលំបាក ប៉ុន្តែជាគន្លឹះសម្រាប់ការព្រមានជាមុន។ ដូច្នេះ ក្រុមការងារបានបង្កើតប្រព័ន្ធតាមដានពេលវេលាជាក់ស្តែង ដើម្បីព្យាករណ៍ទឹកជំនន់បែបនេះ ដោយផ្អែកលើទិន្នន័យរ៉ាដាទឹកភ្លៀងរបស់ក្រសួងបរិស្ថាន និងកំណត់ត្រាការខូចខាតនៃទឹកជំនន់។
ប្រព័ន្ធនេះកំណត់កម្រិតសម្រាប់អាំងតង់ស៊ីតេទឹកភ្លៀង កម្រិតទឹកទន្លេ និងកម្រិតសំណើមដី ដែលបង្កឱ្យមានការជូនដំណឹងនៅពេលលើស ហើយលទ្ធភាពនៃទឹកជំនន់ត្រូវបានកើនឡើង។
នៅក្នុងប្រតិបត្តិការសាកល្បងរយៈពេល 4 ឆ្នាំចុងក្រោយ ដោយគិតចាប់ពីឆ្នាំ 2019 មក ក្រុមការងារបាននិយាយថា ប្រព័ន្ធព្យាករណ៍ទឹកជំនន់ភ្លាមៗ ត្រូវបានបង្ហាញឱ្យឃើញប្រសិទ្ធភាពក្នុងការទស្សន៍ទាយទឹកជំនន់ដ៏ធំនៅទូទាំងប្រទេសយ៉ាងតិចបំផុតត្រឹមមួយម៉ោងមុន ពេលកើតឡើង។ វាបានព្យាករណ៍ពីទឹកជំនន់ភ្លាមៗនៅក្នុងព្រឹត្តិការណ៍ភ្លៀងធ្លាក់ខ្លាំងចំនួន 31 ជាមួយនឹងអត្រាជោគជ័យ 90 ភាគរយក្នុងឆ្នាំ 2019 ។ លោក Hwang បាននិយាយថា ក្រុមការងារនឹងប្រើប្រាស់បច្ចេកវិទ្យាសិប្បនិម្មិត ដើម្បីកែលម្អបន្ថែមទៀតនូវភាពត្រឹមត្រូវនៃការព្យាករណ៍ទឹកភ្លៀងដែលត្រូវបញ្ចូលទៅក្នុងប្រព័ន្ធ។ លោកបាននិយាយថា ពួកគេក៏កំពុងបង្កើតវិធីសាស្រ្ត ដើម្បីផ្ទៀងផ្ទាត់ថាតើទឹកជំនន់បានកើតឡើងដែរឬទេ ដោយប្រើវីដេអូ CCTV ឬមាតិកាដែលបានបង្ហោះដោយអ្នកប្រើប្រាស់នៅលើប្រព័ន្ធផ្សព្វផ្សាយសង្គម ដើម្បីគាំទ្រការវិភាគបន្ទាប់ពីទឹកជំនន់ ដើម្បីវាយតម្លៃភាពត្រឹមត្រូវនៃការព្យាករណ៍។
ក្នុងរយៈពេលវែងជាងនេះ លោក Hwang បាននិយាយថា ប្រព័ន្ធនេះនឹងជួយអាជ្ញាធរកាត់បន្ថយផលប៉ះពាល់នៃទឹកជំនន់ភ្លាមៗ ដោយធ្វើការព្យាករណ៍ឱ្យបានត្រឹមត្រូវ។
លោកបាននិយាយថា “វិធានការទាំងនេះអាចរួមបញ្ចូលការពង្រឹងរចនាសម្ព័ន្ធដែលងាយរងគ្រោះ ការបង្វែរទឹក ឬការអនុវត្តរបាំងទឹកជំនន់បណ្តោះអាសន្នជាដើម។
ព្រោះថាសកម្មភាពបែបនេះអាចកាត់បន្ថយការខូចខាត ដែលអាចកើតមាន និងជួយក្នុងការត្រៀមខ្លួនកាន់តែប្រសើរឡើង” ។
