Full Post Style

កាលពីថ្ងៃទី 8 ខែសីហា ឆ្នាំ 2023 បើយោងតាមទីភ្នាក់ងារសារព័ត៌មាន Reuters បានឲ្យដឹងថា សេវាសង្គ្រោះបន្ទាន់របស់ន័រវេសបានជម្លៀសមនុស្សរាប់រយនាក់នៅតាមទីតាំងផ្សេងៗគ្នា កាលពីថ្ងៃអង្គារ ដែលជាថ្ងៃទីពីរនៃភ្លៀងធ្លាក់ខ្លាំង ហើយវាក៏បង្ករឱ្យមានការរអិលបាក់ដីជាមួយនឹងហានិភ័យកាន់តែច្រើននៅពេលដែលព្យុះបានបោកបក់លើតំបន់ Nordics ។

ខ្យល់បក់ខ្លាំង បូករួមជាមួយនឹងភ្លៀងធ្លាក់ខ្លាំង ទើបធ្វើឲ្យការរអិលបាក់ដីបានវាយប្រហារផ្នែកខ្លះនៃតំបន់ Nordic ដោយផ្តាច់ចរន្តអគ្គិសនី ក្នុងភូមិបានជន់លិចទឹក និងនាំការដឹកជញ្ជូនសាធារណៈដល់ការផ្អាកនៅក្នុងតំបន់ដែលរងផលប៉ះពាល់ខ្លាំងបំផុត។

ព្យុះមួយនេះត្រូវបានគេហៅថា “ហាន់” ហើយវាបានវាយប្រហារប្រទេសស៊ុយអែត កាលពីល្ងាចថ្ងៃអាទិត្យ និងបានទៅដល់ប្រទេសន័រវេសកាលពីថ្ងៃច័ន្ទ ដោយផ្នែកខ្លះនៃប្រទេសដាណឺម៉ាក និងហ្វាំងឡង់ក៏រងផលប៉ះពាល់ផងដែរ។

នៅភាគខាងត្បូងប្រទេសន័រវេស គឺមានទឹកជំនន់ និងការរអិលបាក់ដី ដោយនាំមកការបិទផ្លូវ និងបញ្ឈប់សេវាកម្មរថភ្លើងសំខាន់ៗភ្លាមៗ។

នៅទីក្រុង Valdres ការរអិលបាក់ដីបានបំផ្លាញផ្ទះមួយ ប៉ុន្តែគ្មាននរណាម្នាក់រងរបួសទេ ហើយនៅក្នុងទីក្រុង Hemsedal ផ្ទះតូចមួយបានអណ្តែតចុះទន្លេ។

ចំនែកឯកាល​ពី​ថ្ងៃ​ច័ន្ទ រថភ្លើង​ដឹក​អ្នក​ដំណើរ​ស៊ុយអែត​មួយ​គ្រឿង ​បាន​ក្រឡាប់ ​ដោយ​សារ​អាកាសធាតុ​បាន​ធ្វើ​ឲ្យ​មនុស្ស​បី​នាក់​រង​របួស។

មេដឹកនាំនៃគណបក្សភឿថៃ និងគណបក្ស Bhumjaithai ដែលមានអាសនៈសរុបចំនួន 212 បានប្រកាសកាលពីថ្ងៃច័ន្ទ ទី 7 ខែ សីហា ថាពួកគេនឹងព្យាយាមបង្កើតរដ្ឋាភិបាលចម្រុះថ្មីមួយ ដោយពួកគេទាំង ២ បានអះអាងថា ខ្លួនមានការគាំទ្រភាគច្រើនរួចទៅហើយនៅក្នុងសភាតំណាងរាស្រ្តជាប់ឆ្នោត។

មេដឹកនាំគណបក្សភឿថៃ លោក Cholnan Srikaew បាននិយាយថា លោកមានអំណរគុណចំពោះកិច្ចព្រមព្រៀងរបស់លោក Bhumjaithai ក្នុងការចូលរួមជាមួយគណបក្សភឿថៃ “ដើម្បីដោះស្រាយបញ្ហាជូនប្រជាជន និងវិបត្តិជាតិ ជាពិសេសនោះគឺបញ្ហាដែលមានពាក់ព័ន្ធនឹងរដ្ឋធម្មនុញ្ញ”។

“សំឡេង 212 របស់ភឿថៃ និង Bhumjaithai នឹងក្លាយជាមូលដ្ឋានសម្រាប់ការបង្កើតរដ្ឋាភិបាល ហើយនឹងមានច្រើនទៀត ដើម្បីផ្តល់ការគាំទ្រភាគច្រើននៅក្នុងសភា។ ដូច្នេះមិនមានការព្រួយបារម្ភអំពីលទ្ធភាពនៃរដ្ឋាភិបាលដែលមានសំឡេងភាគតិចនោះទេ”។ នេះបើយោងតាម លោក​វេជ្ជបណ្ឌិត ឆុល ណាន ។

គណបក្សភឿថៃបានជាប់ចំណាត់ថ្នាក់ទីពីរនៅក្នុងការបោះឆ្នោតសកលនៅថ្ងៃទី 14 ខែឧសភា ជាមួយនឹងអាសនៈសភាចំនួន 141 បន្ទាប់មកគឺ Bhumjaithai ដែលមាន 71 អាសនៈ។

លោកវេជ្ជបណ្ឌិត Cholnan បាននិយាយថា គណបក្សភឿថៃបានបើកចំហនៅក្នុងការប្រមូលការគាំទ្រសម្រាប់បេក្ខជននាយករដ្ឋមន្ត្រីរបស់ខ្លួន ហើយ “ការគាំទ្រអាចមកពីគ្រប់ភាគី អាចជាសមាជិកម្នាក់ៗនៃគណបក្សណាមួយផ្សេងទៀតផងដែរ”។

លោកបានមានប្រសាសន៍ថា “នៅក្នុងស្ថានភាពនយោបាយដ៏ពិសេសនេះ គឺស្របពេលមានមានការជជែកវែកញែក និងជម្លោះក្នុងសង្គម យើងក៏សុំការបោះឆ្នោតពីគ្រប់ភាគី ដើម្បីគាំទ្របេក្ខភាពរបស់គណបក្សភឿថៃធ្វើជានាយករដ្ឋមន្ត្រី”។

លោក​បាន​បញ្ជាក់​ថា លោក Srettha Thavisin នៅ​តែ​ជា​បេក្ខភាព​របស់​គណបក្ស​ភឿថៃ​ជា​នាយក​រដ្ឋមន្ត្រី។ តែលោក​នឹងមិន​​ប្រើ​ឈ្មោះ​របស់​លោក Srettha Thavisin ​នោះ​ទេ ប៉ុន្តែ​អ្នកដែលអាច ​ក្លាយ​ជា​បេក្ខជន ​ដែល​ប្រកាស​នៅ​ថ្ងៃ​ទី​២ ខែ​សីហា  នោះ​គឺ​លោក Srettha Thavisin ។

មេដឹកនាំបក្សភឿថៃបានអះអាងថា ក្នុងសម្ព័ន្ធថ្មីនឹងមិនរាប់បញ្ចូលគណបក្សចលនាឆ្ពោះទៅមុខ ដែលឈ្នះការបោះឆ្នោតនោះទេ។ លោក បណ្ឌិត Cholnan បាននិយាយថា គណបក្សផ្សេងទៀត និងសមាជិកព្រឹទ្ធសភានឹងមិនគាំទ្ររដ្ឋាភិបាលចម្រុះទេ ប្រសិនបើការបង្កើតរដ្ឋាភិបាលលើកនេះមានការចូលរួមពីគណបក្សចលនាឆ្ពោះទៅមុខនោះ។

គណបក្សចលនាឆ្ពោះទៅមុខបានឈ្នះ 151 អាសនៈនៅក្នុងការបោះឆ្នោតសកល ប៉ុន្តែកិច្ចខិតខំប្រឹងប្រែងរបស់ខ្លួនដើម្បីបង្កើតរដ្ឋាភិបាលចម្រុះទាំងប្រាំបី រួមទាំងភឿថៃបាន ដួលរលំដោយសារការខ្វះខាតការគាំទ្រ ពីគណបក្សផ្សេងទៀតនៅក្នុងសភា និងជាពិសេសមិនមែនមកពីព្រឹទ្ធសភាទេ។

ទោះបីជាចលនាឆ្ពោះទៅមុខ MFP ទទួលបានអាសនៈច្រើនជាងគេក៏ដោយ ប៉ុន្តែលោកបណ្ឌិត Cholnan បាននិយាយថា សម្លេងឆ្នោត 212 របស់ Pheu Thai និង Bhumjaithai ក៏ជាការបោះឆ្នោតស្របច្បាប់របស់ប្រជាជនផងដែរ។ គណបក្ស​ទាំង​ពីរ​មាន​ការ​គាំទ្រ​ជា​សាធារណៈ​ក្នុង​ការ​បង្កើត​រដ្ឋាភិបាល​ថ្មី។

លោកបានប្រកាសពីគោលបំណងសំខាន់ៗមួយចំនួននៃរដ្ឋាភិបាល ដែលបានស្នើឡើង ហើយពួកគេបានរួមបញ្ចូលរដ្ឋធម្មនុញ្ញថ្មី។

លោក​បណ្ឌិត ជុន ណាន បាន​ថ្លែង​ថា​៖ «​នឹង​មាន​ការ​បោះ​ប្រជាមតិ​ដើម្បី​សរសេរ​រដ្ឋធម្មនុញ្ញ​ថ្មី​ដោយ​សភា​ពង្រាង​រដ្ឋធម្មនុញ្ញ។

តែលោក​មិន​បាន​ប្រាប់​ឈ្មោះ​គណបក្ស​ចម្រុះ​ដ៏​មាន​សក្តានុពល​ផ្សេង​ទៀតនោះដែរ។ មេដឹកនាំ​រង​គណបក្ស​ភឿ​ថៃ លោក Phumtham Wechayachai បាន​និយាយ​ថា មនុស្ស​នឹង​មើល​ឃើញ​ថា​គណបក្ស​ណា​ ដែល​គណបក្ស​ភឿ​ថៃ​ខិត​ចូល​ក្នុង​សប្តាហ៍​នេះ។

យោងតាមទីភ្នាក់ងារសារព័ត៌មានរបស់ CNN នៅថ្ងៃទី 08 ខែ សីហា ឆ្នាំ 2023 បានឲ្យដឹងថា លោក Serhii Dobriak ប្រធានរដ្ឋបាលយោធាទីក្រុង Pokrovsk បាននិយាយថា កាំជ្រួច Iskander របស់រុស្ស៊ីចំនួនពីរបានវាយប្រហារទីក្រុង  Pokrovsk ភាគខាងកើតនៃប្រទេសអ៊ុយក្រែន ក្នុងរយៈពេល 30-40 នាទី  ដោយកាំជ្រួចទីពីរបានធ្វើឲ្យមានការរងរបួស ថែមទាំងបានសម្លាប់បុគ្គលិកសេវាសង្គ្រោះបន្ទាន់ ខណៈដែលពួកគេកំពុងសង្គ្រោះមនុស្សនៅតំន់នោះ បន្ទាប់ពីមានការវាយប្រហារលើកដំបូង នេះបើយោងតាមលោក Serhii Dobriak ប្រធានរដ្ឋបាលយោធាទីក្រុង Pokrovsk ។

បើយោងតាមការរៀបរាប់របស់ប្រធានរដ្ឋបាលយោធាទីក្រុង Pokrovsk បានបង្ហោះនៅក្នុងGroup Telegram ថា “ កាំជ្រួចទីមួយបានវាយប្រហារនៅម៉ោង 19:15 នារី ហើយ កាំជ្រួចទីពីរបានវាយប្រហារនៅម៉ោង 19:52យប់ ។ ចំពោះការវាយប្រហារនេះអាចនិយាយបានថា វាគឺជាសេណារីយ៉ូស្តង់ដាររបស់រុស្ស៊ី – ហ្វាស៊ីសនិយម ដែលធ្វើការវាយប្រហារដោយចំនាយពេលត្រឹមតែ- 30-40 នាទីរវាងកាំជ្រួចទី1 និង ទី2។

 នៅពេលដែលសេវាសង្គ្រោះបន្ទាន់របស់រដ្ឋ និងអ្នកជួយសង្គ្រោះមកដល់ដើម្បីជួយសង្រ្គោះមនុស្ស ស្រាប់តែមានកាំជ្រួចទីពីរបានវាយប្រហារបន្តទៀត ដូច្នេះហើយទើបធ្វើឲ្យចំនួនជនរងគ្រោះមានការកើនឡើង”។

លោក​បាន​បន្ថែម​ថា​៖ «​កាំជ្រួច​ផ្ទុះ​ធំ​ណាស់ បង្អួច​ក្នុង​អគារ​ជា​ច្រើន​ត្រូវ​បាន​វាយ​កម្ទេច ក្នុងនោះយ៉ាង​ហោច​ណាស់មាន​បង្អួច​ចំនួន ២០០០បានខ្ទេច»។

មន្ត្រី​មូលដ្ឋាន​បាន​និយាយ​ថា អគារ​លំនៅឋាន សណ្ឋាគារ ហាង និង​អគារ​រដ្ឋបាល​មួយ​បាន​រង​ការ​ខូចខាត។ សណ្ឋាគារ Druzhba (Friendship) Hotel និង Corleone Pizzeria ដែលពេញនិយមជាមួយអ្នកសារព័ត៌មាន ត្រូវបានខូចខាតក្នុងការវាយប្រហារ នេះបើយោងតាមរូបភាពភូមិសាស្ត្រពីកន្លែងកើតហេតុ។

លោក Pavlo Kyrylenko ប្រធានរដ្ឋបាលយោធាក្នុងតំបន់ Donetsk បាននិយាយនៅក្នុងការធ្វើបច្ចុប្បន្នភាពថា ក្នុងចំណោមមនុស្ស 7 នាក់ដែលត្រូវបានសម្លាប់ គឺមានជនស៊ីវិល 5 នាក់ អ្នកជួយសង្គ្រោះម្នាក់ និងទាហ៊ានម្នាក់។

លោក​បាន​និយាយ​ថា មាន​មនុស្ស ៨១ នាក់​បាន​រង​របួស ​ក្នុង​នោះ​មាន​ជន​ស៊ីវិល ៣៩ នាក់ កុមារ ២ នាក់ មន្ត្រី​ប៉ូលិស ៣១ នាក់ អ្នក​ជួយ​សង្គ្រោះ ៧ នាក់ និង​ទាហ៊ានចំនួន ៤ នាក់​។

លោក Pavlo Kyrylenko បានបន្ថែមថា “បើគិតត្រឹមម៉ោង 11:00 ព្រឹក អគារពហុជាន់ចំនួន 12 ត្រូវបានខូចខាត ក៏ដូចជាសណ្ឋាគារមួយកន្លែង ការិយាល័យព្រះរាជអាជ្ញា មូលនិធិសោធននិវត្តន៍ ឱសថស្ថាន ហាងចំនួន 2 ហាងកាហ្វេចំនួន 2 និងរថយន្តស៊ីវិលចំនួន 2” ។

ប៉ូលិសជាតិអ៊ុយក្រែនបាននិយាយថា អនុប្រធានផ្នែកសេវាសង្គ្រោះបន្ទាន់រដ្ឋអ៊ុយក្រែនក្នុងតំបន់ Donetsk លោក Andrii Omelchenko ត្រូវបានសម្លាប់នៅនឹងកន្លែង ហើយបានបញ្ជាក់ថា មន្ត្រីប៉ូលិសចំនួន ៣១នាក់បានរងរបួស។

ប៉ូលីសបាននិយាយនៅលើ Telegram ថា “ពួកគេទាំងអស់ដែលនៅទីនោះ នៅពេលក្រុមអ្នកជួយសង្គ្រោះកំពុងខិតខំប្រឹងប្រែងដើម្បីជួយសង្គ្រោះមនុស្សបន្ទាប់ពីការវាយប្រហារលើកទី មួយ” ។ “ពួកគេបានដឹងថាមានជនរងគ្រោះនៅក្រោមគំនរបាក់បែក ដូច្នេះហើយ ពួកគេម្នាក់ៗ ខិតខំរុះរើអ្នកទាំងនោះចេញពីកន្លែងកើតហេតុ តែជាអកុសល​ គ្រាប់ទីពីរ ក៏បានវាយប្រហារជាថ្មីម្តងទៀត”។

កាលពីថ្ងៃទី 08 ខែសីហា​ ឆ្នាំ 2023 យោងតាមរយៈក្រុមអ្នកសារព័ត៌មាន CNN បាននិយាយថា អ្នកការទូតកំពូលរបស់ចិន លោក Wang Yi បានប្រាប់សមភាគីរុស្ស៊ីថា ទីក្រុងប៉េកាំងនៅតែ “មិនលំអៀង” លើសង្រ្គាមនៅអ៊ុយក្រែន គឺនូវមួយថ្ងៃបន្ទាប់ពីគណៈប្រតិភូចិនបានចូលរួមក្នុងកិច្ចពិភាក្សាអន្តរជាតិស្តីពីការបញ្ចប់ជម្លោះ ដែល រួមមានទីក្រុង Kyiv ប៉ុន្តែមិនមែនជាទីក្រុងម៉ូស្គូទេ។

នៅក្នុងការអំពាវនាវមួយកាលពីថ្ងៃច័ន្ទ លោក Wang បានសង្កត់ធ្ងន់ទៅកាន់រដ្ឋមន្ត្រីការបរទេសរុស្ស៊ីលោក Sergei Lavrov ថា ប្រទេសចិន និងរុស្ស៊ីគឺជា “មិត្តល្អ និងជាដៃគូដ៏គួរឱ្យទុកចិត្តថែមទៀតផង” ។

លោក Wang បាននិយាយថា “ចំពោះវិបត្តិរបស់ប្រទេសអ៊ុយក្រែន ប្រទេសចិននឹងរក្សាជំហរឯករាជ្យ និងមិនលំអៀងទៅភាគីណាមួយនោះទេ។ ការលើកឡើងរបស់អ្នកការទូតជាន់ខ្ពស់របស់ប្រទេសចិនរូបនេះ បានបញ្ចេញនូវសម្លេងដែលប្រកបដោយឆន្ទៈ និងសមហេតុផល ដែលបានជំរុញឲ្យកិច្ចចរចាប្រព្រឹត្តទៅដោយសន្តិភាពនិងសកម្ម សម្រាប់ការខិតខំស្វែងរកដំណោះស្រាយនយោបាយក្នុងឱកាសពហុភាគីអន្តរជាតិ”។ នេះបើយោងតាមសេចក្តីអំពាវនាវដែលចេញផ្សាយដោយក្រសួងការបរទេសចិន។

ការអំពាវនាវនេះបានធ្វើឡើងបន្ទាប់ពីកិច្ចពិភាក្សារយៈពេលពីរថ្ងៃ ដែលរៀបចំដោយប្រទេសអារ៉ាប៊ីសាអូឌីត រួមទាំងសម្ព័ន្ធមិត្តអ៊ុយក្រែនសំខាន់ៗដូចជា សហរដ្ឋអាមេរិក អង់គ្លេស និងអាល្លឺម៉ង់ ព្រមទាំងឥណ្ឌា និងប្រទេសមួយចំនួននៅមជ្ឈិមបូព៌ា បានជួបប្រជុំគ្នា ដើម្បីពិភាក្សាអំពីដំណោះស្រាយនៃជម្លោះដែលបានកើតឡើងប្រហែល 18 ខែ បើគិតចាប់តាំងពីការលុកលុយរបស់ទីក្រុងម៉ូស្គូបានចាប់ផ្តើម។

យោងតាមប្រព័ន្ធផ្សព្វផ្សាយផ្លូវការរបស់អារ៉ាប៊ីសាអូឌីត បានឱ្យដឹងថា ក្រុមនេះបានយល់ព្រមលើសារៈសំខាន់នៃការសន្ទនាអន្តរជាតិដើម្បីស្វែងរក “មូលដ្ឋានរួមដែលនឹងត្រួសត្រាយផ្លូវសម្រាប់សន្តិភាព” ។

ក្នុងនោះផងដែរ លោក Sergei Lavrov រដ្ឋមន្ត្រីការបរទេសរបស់រុស្ស៊ីបាន “កោតសរសើរ និងស្វាគមន៍ចំពោះតួនាទីស្ថាបនារបស់ប្រទេសចិន” ដែលមានបំណងឆ្ពោះទៅរកដំណោះស្រាយនយោបាយនៃ “វិបត្តិអ៊ុយក្រែន” ដោយលោកបានសម្តែងការពេញចិត្តចំពោះ ក្រសួងការបរទេសចិនដែលបាននិយាយ នៅក្នុងការអានការអំពាវនាវរបស់ពួកគេកាលពីថ្ងៃច័ន្ទ។

តើចិនពិតជាមានតួនាទីក្នុងការបង្កើតសន្តិភាពពិតមែនឬ?

នៅមុនកិច្ចពិភាក្សានៅទីក្រុង Jeddah រដ្ឋមន្ត្រីការបរទេសអ៊ុយក្រែន លោក Dmytro Kuleba បានទទួលការអញ្ជើញឲ្យចូលរួមពីខាងប្រទេសចិន​ (នេះអាចបង្ហាញថា “វាជារបកគំហើញដ៏អស្ចារ្យ និងជាជ័យជម្នះជាប្រវត្តិសាស្ត្រមួយ”។

អ៊ុយក្រែន និងសម្ព័ន្ធមិត្តលោកខាងលិច បានបង្ហាញក្តីសង្ឃឹមជាយូរមកហើយថា ប្រទេសចិន និងមេដឹកនាំរបស់ខ្លួន លោក Xi Jinping ដែលជាមិត្តសម្លាញ់ របស់លោកប្រធានាធិបតីរុស្ស៊ី លោក Vladimir Putin អាចដើរតួក្នុងការជំរុញទីក្រុងម៉ូស្គូឆ្ពោះទៅរកសន្តិភាព។

ព្រោះថាលោកលោក Xi Jinping   ត្រូវបានគេមើលឃើញថា លោកពិតជាមានសមត្ថភាពក្នុងការធ្វើឲ្យសម្ព័ន្ធមិត្តរបស់ខ្លួនអាចកែប្រែឥរិយាបទ។ 

ការចូលរួមរបស់ចិននៅក្នុងកិច្ចចរចា នៅទីក្រុង Jeddah បានកើតឡើងនៅពេលដែលប្រទេសនេះបាន ពង្រឹងទំនាក់ទំនងរបស់ខ្លួន ជាមួយអារ៉ាប៊ីសាអូឌីត ហើយក៏កំពុងបង្កើនកិច្ចខិតខំប្រឹងប្រែង ដើម្បីស្តារទំនាក់ទំនងរបស់ខ្លួនឡើងវិញជាមួយដៃគូសេដ្ឋកិច្ចសំខាន់ៗនៅអឺរ៉ុប ស្របពេលដែលមានវិបត្តិសេដ្ឋកិច្ច។

ក្រសួងការបរទេសចិនបាននិយាយថា ទីក្រុងប៉េកាំងនឹងបន្តពង្រឹងការសន្ទនាជាមួយប្រទេសរុស្ស៊ី ដោយផ្អែកលើគោលជំហររបស់ខ្លួនចំនួន 12 ចំណុច ដោយស្តីអំពីដំណោះស្រាយនយោបាយចំពោះវិបត្តិសេដ្ឋកិច្ច នេះបើយោងតាម ​​Reuters ។

យ៉ាងណាមិញ ប្រទេសអ៊ុយក្រែន និងរុស្ស៊ីនៅតែប្តេជ្ញាចិត្តជាសាធារណៈចំពោះលក្ខខណ្ឌ មុនធ្វើការចរចាដោយផ្ទាល់ ប៉ុន្តែសម្រាប់ភាគីទាំងសងខាងនៅតែយល់ថាមិនអាចទទួលយកបាន។