ភ្លៀងបានធ្លាក់ខ្លាំងដោយសារតែសល់សំណល់ពីព្យុះទីហ្វុង Haikui បានបោកបក់មកលើភាគអាគ្នេយ៍នៃប្រទេសចិនកាលពីព្រឹកថ្ងៃពុធ ហើយវាក៏បាននាំមកនូវទឹកជំនន់ ជន់លិចទីក្រុងនានាក្នុងខេត្ត Fujian ដែលបង្ករឲ្យមានការបញ្ឈប់សេវាកម្មរថភ្លើងក្រោមដី ការបិទសាលារៀន ព្រមទាំងបានជម្លៀសមនុស្សរាប់ម៉ឺននាក់ឲ្យចាកចេញពីតំបន់ដែលមានហានិភ័យថែមទៀតផង នេះបើយោងតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ កាលពីថ្ងៃទី ០៦ ខែកញ្ញា ឆ្នាំ២០២៣។
មន្ត្រីឧតុនិយមបាននិយាយថា ភ្លៀងបានបំបែកកំណត់ត្រាចំនួន 12 ឆ្នាំចុងក្រោយនៅក្នុងទីក្រុង Fuzhou នៃខេត្ត Fuzhou ដោយបានជំរុញឱ្យមានការព្រមានថាអាងស្តុកទឹកចំនួន 49 បានលើសកម្រិតនៃការស្តុកទឹកជំនន់។
ទឹកជំនន់ដោយសារទឹកភ្លៀងបានធ្វើឲ្យមានមនុស្សជាង ៣៦.០០០ នាក់ ត្រូវបានជម្លៀសចេញពីផ្ទះសម្បែង ហើយដីស្រែជិត ៤.១៩៥ ហិកតា (១០.៣៦៦ ហិចតា) ត្រូវបានជន់លិច ដែលបណ្តាលឱ្យមានការខាតបង់យ៉ាងធ្ងន់ធ្ងរ ហើយការខូចខាតនេះបានប្រកាសដោយទូរទស្សន៍រដ្ឋថា គឺមានតម្លៃស្មើរនឹង ៥៥២,១ លានយន់ (៧៥ លានដុល្លារ) ។
រូបភាពវីដេអូនៅលើប្រព័ន្ធផ្សព្វផ្សាយសង្គមបានបង្ហាញថា ទឹកជំនន់បានជន់លិចតាមដងផ្លូវក្នុងទីក្រុង Fuzhou និងទីក្រុង Fuqing ភាគខាងត្បូងរបស់ខ្លួន ដោយបានធ្វើឲ្យមានការកកស្ទះម៉ូតូ រថយន្តបានជាប់គាំងនៅលើដងផ្លូវ ជាមួយនឹងធុងសំរាម ។
នៅក្នុងរបាយការណ៍ប្រព័ន្ធផ្សព្វផ្សាយបានបង្ហាញពីរថយន្តដែលលិចទឹក ហាង និងផ្ទះល្វែង ក៏ដូចជាការរអិលបាក់ដីជាដើម។
អ្នកព្យាករណ៍ជាតិបាននិយាយថា ហ្វូចូវបានទទួលភ្លៀងធ្លាក់រហូតដល់ 554 មីលីម៉ែត្រ (1.8 ហ្វីត) កាលពីថ្ងៃអង្គារ។ ចំនែកឯប្រព័ន្ធផ្សព្វផ្សាយរដ្ឋបាននិយាយថា វាជាចំនួនទឹកភ្លៀងដ៏ច្រើន គឺលើសពីបរិមាណដែលនាំមកដោយព្យុះទីហ្វុង Doksuri នៅចុងខែកក្កដាទៅទៀត។
បច្ចុប្បន្នទីក្រុង Fuzhou បានបិទផ្លូវរថភ្លើងក្រោមដី និងផ្អាកសេវាកម្មរថភ្លើង ខណៈដែលសាលារៀនបានបិទសម្រាប់ថ្ងៃទីពីរ។
ខាងកាសែត The Paper ដែលគាំទ្រដោយរដ្ឋ បានដកស្រង់សម្តីមន្ត្រីខេត្តម្នាក់ លោក Chen Yunong បាននិយាយថា ទឹកជំនន់បានវាយប្រហារទីក្រុងជាច្រើនក្នុងខេត្ត Fujian ដោយបង្ហាញពីភាពផុយស្រួយនៃការបង្ហូរទឹកនៅក្នុងទីក្រុង និងហេដ្ឋារចនាសម្ព័ន្ធផ្សេងៗទៀត។
លោក Chen បាននិយាយថា ការលិចទឹកទាំងក្នុងទីក្រុងចាស់ និងតំបន់ទីក្រុងថ្មីត្រូវតែដោះស្រាយជាបន្ទាន់។
សម្រាប់តំបន់ Putian និង Quanzhou ដែលស្ថិតក្នុងចំណោមទីក្រុងចំនួនប្រាំមួយកន្លែងផ្សេងទៀតនៅក្នុង Fujian ដែលត្រូវបានគេដាក់ទង់ថាមានហានិភ័យនៃទឹកជំនន់ភ្លាមៗ និងការរអិលបាក់ដី។ អភិបាលខេត្តបាននិយាយប្រាប់អាជ្ញាធរមូលដ្ឋានឲ្យរៀបចំការជម្លៀសប្រជាពលរដ្ឋឲ្យចេញពីតំបន់ដែលទំនងជារងគ្រោះខ្លាំងជាងគេ។
ភ្លៀងត្រូវបានគេរំពឹងថានឹងបន្តរហូតដល់ថ្ងៃសុក្រនៅផ្នែកកណ្តាល និងភាគខាងត្បូងនៃខេត្ត ដែលព្យុះទីហ្វុង Haikui បានបោកបក់មកលើដីនៅព្រឹកថ្ងៃអង្គារ មុនពេលបាត់បង់កម្លាំង និងត្រូវបានបន្ទាបទៅជាព្យុះត្រូពិចវិញ។
