ភាពតានតឹងរវាងប្រទេសកូរ៉េ និងចិនបានផ្ទុះឡើងម្តងទៀតហើយកាលពីដើមសប្តាហ៍នេះ ខណៈដែលភាគីទាំងពីរបានជជែកគ្នាអំពីរចនាសម្ព័ន្ធរបស់ចិនដែលបានដំឡើងនៅសមុទ្រខាងលិចក្នុងអំឡុងពេលកិច្ចសន្ទនាកម្រិតខ្ពស់ដែលបានធ្វើឡើងកាលពីថ្ងៃពុធ នេះបើយោងតាមការរាយការណ៍ពីក្រសួងការបរទេសរបស់កូរ៉េខាងត្បូង។
ចំណុចសំខាន់នៃភាពល្អក់កកររវាងប្រទេសទាំងពីរខាងលើនេះ គឺដោយសារតែកាលពីពេលថ្មីៗនេះប្រទេសចិនបានសាងសង់ស្ថានីយ៍មួយកន្លែងដែលស្ថិតនៅក្នុងតំបន់វិធានការបណ្តោះអាសន្ន (PMZ) ដែលជាតំបន់សេដ្ឋកិច្ចផ្តាច់មុខនៃប្រទេសទាំងកូរ៉េខាងត្បូង -ចិន គឺនៅឯសមុទ្រខាងលិច។
រដ្ឋាភិបាលកូរ៉េខាងត្បូងបានសម្តែងការព្រួយបារម្ភយ៉ាងខ្លាំងចំពោះរចនាសម្ព័ន្ធរបស់ប្រទេសចិនមួយនេះ ដោយលោកបាននិយាយថា ចិនកំពុងតែចង់រំលោភលើសិទ្ធិដែនសមុទ្ររបស់ប្រទេសខ្លួន ហើយវានិងធ្វើឱ្យមានអស្ថិរភាពដល់សន្តិសុខក្នុងតំបន់ជាមិនខាន។
បើយោងតាមការរៀបរាប់ពីមន្ត្រីរបស់ប្រទេសចិនពួកគេបាននិយាយរៀបរាប់ថា គ្រឿងបរិក្ខារទាំងអស់នោះ គឺចិនមានគោលបំណងសាងសង់សម្រាប់កសិកម្មតាមសមុទ្រប៉ុណ្ណោះ ហើយវាមិនបង្ករឲ្យមានបញ្ហាប៉ះពាល់ដល់អធិបតេយ្យភាព ឬព្រំដែនផ្លូវទឹកនោះឡើយ។
បើទោះបីជាភាគីទាំងពីរមិនបានដោះស្រាយការខ្វែងគំនិតគ្នាក្នុងអំឡុងពេលកិច្ចប្រជុំកាលពីថ្ងៃពុធនេះយ៉ាងណាក៏ដោយ ក៏ពួកគេបានយល់ព្រមបន្តការពិភាក្សាតាមរយៈអនុគណៈកម្មការពីរដែលទើបបង្កើតថ្មីដដែល។ ទីមួយគឺការផ្តោតលើបញ្ហារសើបដូចជារចនាសម្ព័ន្ធសមុទ្រខាងលិច និងការនេសាទខុសច្បាប់។ ពីរ គឺការត្រួតពិនិត្យកិច្ចសហប្រតិបត្តិការជាក់ស្តែងក្នុងវិស័យនានា រួមទាំងការពង្រឹងស្តុកត្រី និងការស្វែងរកការជួយសង្គ្រោះតាមសមុទ្រជាដើម។
